Neðanmálsvísur og dónasögur

2007-01-31T09:14:00.000Z

Tilkynning tilkynning!

Nú ætla ég að færa mig um set og blogga hér:

www.kommunan.is/hildur

Já:

www.kommunan.is/hildur

Vinsamlegast breytið því í tenglalistunum ykkar og/eða Favorites..!

PS. Auk þess legg ég til að Moggabloggið verði lagt niður.
Góðar stundir.

2007-01-30T13:52:00.000Z

Það borgar sig að vera svartsýnn. Það hef ég alltaf sagt.
Þess vegna spái ég því að leikurinn við Danmörku í kvöld verði jafn og taugastrekkjandi allan tíman, en að Danaskammirnar eigi eftir að vinna í lokin. Og verða geðveikt montnir á svip.
Hvað um það, ég spáði því í byrjun keppninnar að Íslendingar ættu eftir að lenda í 6.sæti. Ég vona að það komi á daginn í dag að ég vinn ekki veðmálið (semsagt með sigri Íslendinga á Dönum), en ef svo fer að ég vinn veðmálið fæ ég fjöldann allan af bjórkippum að launum. Við settum nefnilega öll bjór í svona "pott" í vinnunni og spáðum til um úrslitin. Ég bannaði öllum öðrum, sem gerðu sig líklega, að spá 6.sætinu. Og fólk var svo miklar smásálir að það hlýddi mér. Múhahahaha

2007-01-29T12:35:00.000Z

Tilkynning frá vefstjóra:
Færslu eytt vegna óviðurkvæmilegra og villandi ummæla.

2007-01-28T17:54:00.000Z

Á föstudaginn síðastliðinn kom ég í Barmahlíð, til foreldranna og kattarins, beint eftir vinnu, og af því að ég var þreyttari en fjandinn ákvað ég að fleygja mér í smástund í herbergi systur minnar. Sökum mikillar þreytu steinsofnaði ég svona um klukkan hálf sjö svaf eins og björn í hýði þar til kötturinn emjaði í eyrað á mér klukkan hálf átta næsta morgun. Hann hefur aldrei verið mjög hlynntur því að fjölskyldumeðlimir sofi út á morgnanna þannig að ég var ekki hissa að hann skyldi vekja mig. Hitt fannst mér skrítnara að ég skyldi hafa sofið svona lengi og að enginn annar skyldi hafa vakið mig fyrr. Svefndrukkin labbaði ég fram með dýrið í fanginu og sá þá að foreldrar mínir voru vaknaðir og hressir og sögðu, jæja, komdu nú og fáðu þér smá kjúkling. Mér fannst eitthvað skrítið við að allir skyldu vaknaðir svo snemma á laugardagsmorgun og búnir að reiða fram kjúkling og salat í morgunmat. En ég hugsaði með mér að ef til vill hefði svona margt breyst frá því að ég flutti að heiman.
Við morgunverðarborðið fór mamma að gantast yfir því að pabbi hefði skammað sig fyrir að hrósa Pólverjunum fyrir að raða upp. Niðri í kjallara í Barmahlíð leigja tveir Pólverjar herbergi og ég skildi þetta sem svo að þeir hefðu raðað eitthvað upp niðri í kjallara og að mamma hefði hrósað þeim fyrir það. Ég var afar hissa á því að pabbi hefði í fyrsta lagi haft nokkra skoðun á því hvernig húsgögnum væri raðað niðri í kjallara, og í öðru lagi skammað mömmu fyrir að vera á annarri skoðun en hann. Ég hefði byrst mig við pabba og minnt hann á þá einföldu staðreynd að þessir innflytjendur hefðu sannarlega ekki komið til Íslands til að láta pabba vera hryssingslegan við sig, ef ég hefði ekki verið of svefndrukkin og ringluð ennþá.
Nei svo komst ég að því að klukkan var hálfátta um föstudagskvöld en ekki á laugardagsmorgni og ég hafði bara sofið í einn klukkutíma. Og að mamma hefði hrósað pólska landsliðinu fyrir eitthvað hraðaupphlaup í leiknum gegn íslenska landsliðinu deginum áður, og að pabbi tapsári hefði þá orðið foj.

Já maður veður ekki í vitinu.

2007-01-25T13:35:00.000Z

http://mbl.is/mm/frettir/innlent/frett.html?nid=1249329
Kosningaaldur niður í 16 ár?
Hvílíka ekki-þingsályktunartillagan atarna!

2007-01-24T09:26:00.000Z

Oj
Ég var á svona bensínstöð í gær og þá var lítil, feimin og ljóshærð stelpa með gleraugu að afgreiða, kannski svona 17 eða 18 ára. Þegar ég gekk að afgreiðsluborðinu var hún að afgreiða einhvern nágunga sem var giska litlu eldri en hún og alger svona tjokkó, gæti verið karlmódel. Hún var greinilega ýkt feimin við hann og roðnaði og stamaði -og hvað haldið þið að mannkertið hafi gert í því? Jú hann var bara hranalegur við hana, greip frammí fyrir henni þegar hún sagði einhver hikorð og þóttist hneykslaður á því þegar hún sagði Ha?
Mig langaði til að hrinda honum og dauðsé núna eftir að hafa ekki gert það.
Hvað fær annars fólk til að vera svona hranalegt við þá sem eru feimnir? Og hvernig ætli það sé að vera svo fallegur að maður telur sig hafa fullan rétt og ástæðu til að gera feimnum unglingum lífið leitt? Þegar kom að því að afgreiða mig virtist hún vera frekar miður sín blessunin og ég passaði að vera sérlega almennileg við hana, og þegar hún lét mig skjálfhent óvart fá svona vítamínsprengdan Topp (sem mér finnst ógeð) í stað Kristals með Mexican Lime sagði ég ekki neitt heldur tók við honum og þakkaði pent. En það hefur varla verið nein huggun harmi gegn að einhver hálfþrítug kona úr Vesturbænum skyldi sleppa því að vera hranaleg við hana eftir að herra bjútifúl var hreinasta andstyggð.

2007-01-23T12:44:00.000Z

Stúdentaráðskosningar eru nú framundan og þó svo að ég hafi skipað annað sæti Háskólalistans í fyrra kom ég eiginlega of seint inn í baráttuna. Þá meina ég eftir að ég hafði lokið BA námi og byrjað nám í alþjóðasamskiptum, sem ég komst síðan að því að ég hafði ekki nægan áhuga á að klára.
Nema hvað, ég vona auðvitað að listanum gangi vel í kosningunum. Og ég verð að segja að mikið afskaplega finnst mér leiðinlegt að hann hafi enn sem komið er ekki valkost um annað en að vera litla framboðið í kosningabaráttu þriggja lista. Ég held að það sé það sem skaði hann einna mest en ekki sú staðreynd að hinn almenni háskólanemi sé ekki sammála okkur í því að það þarf að breyta þessu kerfi.
Sjálf tók ég listakerfinu sem sjálfsögðum hlut í háskólanum. Fyrsta árið eftir að ég var komin úr skiptinámi á Spáni þekkti ég margt gott fólk á lista Vöku og hjálpaði þeim aðeins þótt ég hefði aldrei gengið svo langt að ganga til liðs við fylkinguna. Seinna árið þekkti ég hins vegar mun fleiri í Röskvu og vegna kunningsskapar við Magnús Má nokkurn, núverandi formann UJ og Röskvumann, tók hann viðtal við mig sem hinn almenna stúdent sem hefði blandað ólíkum námsgreinum saman, í Röskvublaðið. Sjálf hafði ég ekki hugmynd um að það viðtal yrði stimplað sem einhver stuðningsyfirlýsing við Röskvu -enda hefði ég ekki viljað skrifa undir slíkt. Mér fannst leitt að geta ekki valið úr því góða fólki sem skipaði lista Vöku og Röskvu.
Og þó að Háskólalistinn boðaði einstaklingskosningar komst það ekki almennilega til skila hjá mér, af því að ég hugsaði með mér að með því að kjósa hann væri ég að kjósa baráttu fyrir einhverju öðru en raunverulegum hagsmunum stúdenta.
Þegar Arndís bauð mér hins vegar að kynna mér að koma á fund hjá Hlistanum ákvað ég að slá til enda hugsaði ég með mér að það byggi etv eitthvað fleira að baki hjá þeim. Og komst þá að því að þetta var einmitt svarið fyrir mig, enda væri þetta listi sem berðist fyrir því að breyta leikreglunum og sameina stúdenta í sinni baráttu. Þessi ofuráhersla á einstaklingskosningar, sem listinn hefur etv sett, var ekki nógu lýsandi fyrir það.
Hvað um það, eins og ég segi vona ég að sem flestir stúdentar íhugi að kjósa um breyttar leikreglur og öflugri baráttu í kosningunum. x-H.

2007-01-22T09:36:00.000Z

Undirheimar Garðabæjar?
http://vids.myspace.com/index.cfm?fuseaction=vids.individual&videoID=1622229532
Tékkið á þessu, put your hood up, aight. Live from Reykjavík Iceland, sjáið hvað þessir seðlar eru flottir líka, íslenskar krónur í þúsundum taldar.
Ég veit ekki hvort þetta séu íslenskir strákar, hef aldrei séð þá, en satt að segja finnst mér þeir það góðir í útlensku að það hljómar ósennilega.
Og nú er ég að spá í að senda uppgjafa sjómann af Bolungarvík til Miami að syngja slagara um hvað kvótakerfið rústaði byggðalaginu.

2007-01-21T16:29:00.000Z

Stundum þegar fólk er að baktala aðra hreytir það úr sér í fullkomnu yfirlæti: Æ hún er svo reið, eða Æ hann er svo reiður. Eins og það þýði sjálfkrafa að viðkomandi sé alger undirmálsmaður, öfundi því allt og alla í kringum sig og geti af þeim sökum ekki verið skítsama eða í alla staði ignorant.
En ég segi: Í guðs bænum verið reið. Mótmælið öllu óréttlæti af krafti, verið róttæk og steytið hnefum í loftið. Því að ef þið eruð ekki reið getið þið alveg eins verið hverjir aðrir ekkisens plebbar og ómenni sem vita ekki neitt um neitt og hafa ekki áhuga á neinu nema því að keyra um á hömmerum með tuttugu og fjögurra tommu keilubassaboxi.

2007-01-19T13:19:00.000Z

Í morgun keyrði ég óvart öfugan hring í hringtorgi við Hádegismóa. Eða reyndar var það ekkert öfugur hringur heldur meira svona öfug átt. En það var enginn annar nærri þannig að engan sakaði og Löðruglan sá mig ekki einu sinni.
Ef það eiga að vera viðurlög við því að vera svo svefndrukkinn að maður brýtur umferðarlög finnst mér að það ættu líka að vera viðurlög við því að láta mann mæta í vinnu klukkan hálfníu á morgnanna í fimbulkulda úti í rassíbala.

Góða helgi.

2007-01-18T09:29:00.000Z

Hann Dúlli, bíllinn minn, hefur verið eitthvað að hósta á mig undanfarið og tvisvar á síðustu svona 30 dögunum hefur hann neitað að hrökkva í gang nema með hjálp utanaðkomandi aðila. En nú er ég búin að komast að því hvað olli. Vetur konungur hefur séð til þess að ísnálar og klakar hafa myndast í bensíntanknum þannig að engu er líkara en að bílskruddan sé að reyna að éta með tappa í munninum. Nú er ég búin að setja á hann ísvörn og hann gengur smurt.
Ég hélt það væri bara ég sem þyldi ekki hita undir frostmarki, en við Dúlli erum eins að því leytinu til að við höfum ekkert á móti skammdeginu svo lengi sem við losnum við bölvað frostið.

2007-01-17T12:10:00.000Z

Í gær var ég spurð í fullri alvöru hvort ég væri stundum kölluð Dudda. Það fannst mér hið mesta ruglumbull og fnæsti úr hneykslun. Svo fór ég að spá. Af hverju er ég aldrei kölluð Dudda? Það er ekkert órökrétt!
Tek það annars fram að ef einhver vogar sér að taka upp á því að kalla mig því sparka ég í viðkomandi.
Nema hvað.

Hef tekið þá ákvörðun að halda mig utan stjórna ungliðahreyfinga ónefndra stjórnmálaflokka. Veit ekki hvort ég eigi eftir að draga mig inn í slíkt aftur í framtíðinni, en kannski geri ég bara eins og gamla fólkið og fer í sérframboð. Býð fram Hildaredduflokkinn: vinstrisinnaðan, pólitískt réttþenkjandi, femínískan og í alla staði skemmtilegan.

2007-01-16T12:59:00.000Z

Ég hitti selebb
Fyrir helgi dreymdi mig að George Bush væri í matarboði heima hjá foreldrum mínum og að Chelsea Clinton, sem var dóttir hans í draumnum, væri líka stödd í boðinu. Vitaskuld töluðu þau reiprennandi íslensku eins og allir sem af einhverjum ástæðum rata í draumana mína, og það eina sem mér datt í hug að tala um við þau var hvernig væri að vera selebb. Heimsmálin eru mér greinilega ekki mjög ofarlega í huga.

Það væri annars gaman að vita hvað svona rugldraumur táknar.

2007-01-15T09:25:00.000Z

Að gefnu tilefni tek ég fram að ég er ekki orðin grænmetisæta þó ég sé að velta þeim möguleika fyrir mér. Ég er svona manneskja sem veltir fyrir sér hlutunum í kverúlantakasti á kaffihúsum miðborgarinnar. Enda á ég örugglega aldrei eftir að stofna fyrirtæki.
Það sem helst letur mig til þess að gerast grænmetisæta er eftirfarandi:

-Matvendni mín er næg fyrir. Borða til dæmis engan indverskan mat, ekki hamborgara, hvítt súkkulaði, diet-drykki, kíví, mangó, kúrbít, mygluost, grænskosts-jukk, súrt nammi og svona má lengi telja.

-Ég get ekki verið að standa í því að sniðganga allt skótau úr leðri þó ég sniðgangi alla loðfeldi af ákveðni.

-Pabbi segir að maður verði heimskur af því að borða bara grænmeti. Hvar á ég þá líka að fá mínar Omega-3 fitusýrur, sem gera mann gáfaðan?

Þegar stórt er spurt.

2007-01-12T11:17:00.000Z

Undanfarið hef ég verið að velta fyrir mér því sem kallast á góðri íslensku veganismi. Stundum finnst mér svo siðferðislega rangt að borða kjöt að ég held ég geti ekki annað en velt fyrir mér möguleikanum á því að hætta því. Mig langar að vita hvort það eru einhverjir sem geta frætt mig um hvernig lífið er sem vegan. Er þetta ósniðug hugmynd?

2007-01-11T16:04:00.000Z

Mikið afskaplega og óskaplega er erfitt að koma sér í gang þegar það er frost úti. Og vikan lengi að líða.
Samt kvarta ég ekkert undan myrkrinu. Ó mig auma.

Hvað á ég annars að gefa systlu í 28 ára afmælisgjöf?

2007-01-10T11:52:00.000Z

Það er við hæfi að bloggfærsla dagsins sé í Blaðinu í dag, reyndar með alveg foxljótri mynd. En þar er ég að skjóta á atvinnugrínara þessa lands.

2007-01-09T10:02:00.000Z

Þetta er eitt aumasta yfirklór sem ég hef séð.

Rétt er að taka fram að Múrinn aðhyllist sem fyrr femínisma og jöfnuð á öllum sviðum og hefði það í raun átt að vera hafið yfir allan vafa.

Afskaplega finnst mér þetta billeg skýring. Það er semsagt alveg sama hversu svívirðileg ummæli birtast á múrnum, maður á bara að vita að múrverjar eru æði. Vá. -Og Frjálslyndir eru ekki rasistar. Einmitt.

Úr því að minnst er á Múrinn: Mér finnst það í flesta staði mjög gott vefrit og þó svo að hægrikratar fyrirlíti mig fyrir þá skoðun mína og í raun og veru hef ég gróflega áætlað að ég sé sammála um það bil 95 af því sem þar kemur fram. Rétt er þó að geta að hin fimm prósentin eiga það til að misbjóða mér gróflega. Dæmi um það er hér.

2007-01-08T09:32:00.000Z

Ákvað að gera smá hárgreiðslutilraun fyrir framan spegilinn í gær og klippti hálfpartinn á mig topp. Samt ekki alveg. Ég veit ekki alveg hvað ég var að spá en útkoman er allavegana nokkurn vegin á þá leið: Austur-Þýskaland á níunda áratugnum. Það er að segja ef ég er ekki með heilu efnaverksmiðjurnar og málmklemmurnar á hausnum.
Minnir mig á þegar ég var svona sjö, átta ára og mamma fór með mig á hárgreiðslustofu. Í einfeldni minni hélt ég að það ætti að klippa úr mér krullurnar en hárgreiðslukonan var svo hrifin af flókahrúgunni á hausnum á mér að hún setti í mig styttur. Úff ég er ekki búin að jafna mig á þeirri skelfilegu sjón sem spegilmynd mín var í kjölfarið. Það má segja að eitthvað hafi hreinlega brostið innra með mér. Já já.

2007-01-06T17:30:00.000Z

Í gær skellti ég mér ásamt öðrum góðum frökenum á 101 bar að drekka kokteila. Eða reyndar bara einn kokteil, málið var að hin mjög svo pirraða þjónustustúlka "lét mig ekki eiga neitt inni hjá henni" heldur krafðist þess að ég pantaði áður en ég náði að kíkja á kokteilalistann þannig að ég pantaði bara Mojitó eins og einhver byrjandi. En um leið og ég sá listann sá ég eftir að hafa ekki pantað Long Island Ice Tea sem var til og ákvað að ég myndi fá mér hann næst. Svo þegar Mojitóinn var búinn strunsaði sama þjónustustúlka að borðinu og henti reikningnum í okkur. Við túlkuðum það á þá leið að við værum ekki aufúsugestir í hennar augum þannig að við færðum okkur um set og á stað þar sem engir kokteilar voru í boði.
En nú er ég búin að ákveða að næst þegar ég fer í kokteilaþamb ætla ég að fá mér Long Island Ice Tea og jafnvel búa hann bara til sjálf.
Er þetta ekki góð saga?

2007-01-05T10:46:00.000Z

Horbjóður
Ýmislegt lærir maður af því að liggja yfir erlendum fréttamiðlum allan liðlangan daginn. Vissuð þið til dæmis að til er stofnun í Bandaríkjunum sem heitir Death Penalty Information Center?

2007-01-03T14:53:00.000Z

Stundum þegar ég er í hugaræsingi byrja ég allar setningar á orðunum "Sjitt, veistu hvað?..." Svo segi ég líka oft "Dísis". Samt verð ég tuttugu og sjö ára gömul eftir rúma fjóra mánuði og ekki við hæfi að manneskja á þeim tímapunkti í lífinu sé gelgja.
En hvað getur maður gert? Ég var mjög alvörugefið barn þangað til ég breyttist í ögn glaðværari gelgju. Ég stórefast um að ég geti verið glaðvær ekki-gelgja. Þá get ég alveg eins bara breyst aftur í barn.

2007-01-01T18:16:00.000Z

Til hamingju með árið!
Gamlárskvöld var harla ómerkilegt hjá mér, ég borðaði mat með fjölskyldunni, fór með henni upp á Klambratún á miðnætti að horfa á flugelda og verða fyrir nokkrum slíkum af hendi einhverja vanvita sem stóðu nálægt og voru nógu drukknir til að snúa einni tertunni vitlaust svo dæmi séu tekin. Nælonsokkabrókin sem ég var í sviðnaði rétt fyrir ofna hægra hnéð (án þess þó að ég brenndist sjálf) og mátti ég svo standa í ströngu við að dusta púður- og flugeldapappírsleifar úr hárinu á mér.
Ég sleppti því að djamma síðar um kvöldið og fór þess í stað heim til mín -í miðbænum nóta bene- og skalf þar úr aulahrolli yfir hópi af fólki sem stóð beint fyrir utan húsið mitt og kyrja þjóðsönginn. Fyrir utan það hvað þjóðsöngurinn er óáheyrilegur í sjálfu sér verður hann hreinasta hörmung þegar ófaglærðir söngvarar raula hann auk þess sem slíkur gjörningur ber vott um þá andstyggð sem þjóðerniskennd er. Já ég veit ég er pólitískt rétttrúuð en ég er líka bara stolt af því.

Ég vona að árið 2007 verði ykkur og sjálfri mér gott.

2006-12-30T20:30:00.000Z

Kallana bakvið eldavélina
Það er staðfest.Daglegum heimsóknum á síðuna mína fjölgar jafnan hratt í hvert skipti sem ég röfla um pólitík, á minns eigins ómálefnalega hátt. Svo þegar ég tek mig aftur til við að bulla um innihaldslaus dægurmál fækkar heimsóknunum þannig að ég lít svo á að réttast er að ég haldi mig við tíkina sem kennd er við póli. Það væri mér mikill heiður að vera látin svara fyrir einhverja dómadags vitleysuna af hillybillsterinni, þegar ég er orðin stór og kannski alvöru pólitíkus.

Ég hvet annars allt verkafólk landsins til að sameinast í byltingu gegn kapítalistunum á nýju ári, lögregluna til að fangelsa alla meðlimi Frjálslynda flokksins og konur til að hlekkja karlana sína á bakvið eldavélarnar.

2006-12-29T09:13:00.000Z

Kannski er jafnrétti kynjanna bara goðsögn
Lenti í bílafokki fyrir framan Wordclass í gær þar sem bíllinn varð rafmagnslaus. Mér gekk ekkert að koma honum af stað og ég ætlaði næstum að gefast upp. Þá komu þrír hraustir karlmenn mér til bjargar og redduðu málunum í snarhasti. Nema hvað, þetta er auðvitað ekki í fyrsta eða annað skipti sem ég lendi í bílasjálfheldu og neyðist til að treysta á velviljaða karlmenn til að deyja ekki drottni mínum úr úrræðaleysi. Og ég fór að hugsa: ætli ég standi undir nafni sem öfgafemínisti og kvenréttindafrekja (sem ég stæri mig oft af því að vera) þegar svona er ástatt með sjálfsbjargargetu mína? Kannski á ég bara ekkert að vera að vilja upp á dekk!
Annars grunar mig að þessir herramenn hafi hjálpað mér í gær fyrst og fremst með það í huga að ég myndi síðan segja vinkonum mínum frá því hvað þeir voru almennilegir í næsta saumaklúbbi. Sem ég og gerði í gærkvöldi, þó svo að frásögnin hafi fyrst og fremst snúist um hvað ég væri mikill auli.

Yfir í annað. Það væri gaman að vita hvort þessi grein fjallaði um aðalhugðarefni frjálshyggjumanna nær og fjær, sem eru klám, vændi og fíkniefni. Það er svo fyndið með frjálshyggjumenn að eins oft og hægt er að vera sammála þeim í ýmsum prinsippmálum (td varðandi frjálst flæði innflytjenda, réttindabaráttu minnihlutahópa á borð við samkynhneigða osfrv) þá tekst þeim svo rækilega að gjaldfella eigin baráttu með því að setja samasemmerki á milli frelsis annars vegar og kláms, vændis og fíkniefna hins vegar. Eða kannski er ég bara tepra.

2006-12-27T09:24:00.000Z

Það var erfitt að vakna í morgun..
.. og ekki bara af því að ég stóð í ströngu í gær við hangikjöts- og hnallþóruát með móðurfjölskyldunni og síðan við rauðvínsdrykkju og ostaát með vinkonunum langt fram á nótt. Nei, það erfiðasta í morgun var útbelgdi maginn og fílafæturnir sem þjökuðu mig. Saltað kjöt fer síst vel í mig á þessum síðustu og verstu og nú stend ég í ströngu við að sturta í mig detox-tei. Þið mynduð ekki vilja vera ég á annan í hamborgarahrygg.

Annars er ég glöð að vita af því að til er íslensk Borat-fjölskylda. Njótið.

2006-12-25T00:05:00.000Z

Gleðileg jól lömbin mín!
Um tvöleytið í dag fékk ég heimsókn frá tveimur Vottum Jehóva. Það voru kona og barn sem bönkuðu upp á hjá mér. Ég sagði eiginlega ekkert þegar þau komu heldur fór inn í eldhússkáp, tók pakka af smákökum og bauð þeim að fá sér. Þau þáðu það með þökkum og ég bað þau vel að lifa og kvaddi með bros á vör. Það eiga sjálfssagt allir einhverjar sögur af uppáþrengjandi trúboðum og flestir virðast hafa hjarta í sér til að segja þeim að snáfa í burtu og skella á þá. En ekki ég. Það hlýtur að vera slítandi að vera svo einlægur í sinni trú að maður leggi þetta á sig, að vera uppnefndur og stjakaður í burtu af heiðingjum sem vilja ekki frelsast. Þetta er kannski dálítið svipað því og að vera sölumaður vonlausrar vöru. Ég man þegar ég var að afgreiða í Dorothy Perkins; ég tók ekki á móti viðskiptavinum með bros á vör og í sölugírnum. Þvert á móti hugsaði ég "Ef fólk vill koma og kaupa þessi ljótu föt er mér alveg sama, ég ætla ekki að pranga þeim upp á neinn." -enda entist ég ekki lengi í því starfi.
Það sem mér finnst reyndar sérstaklega miður við Votta Jehóva er hvað þeir nota mikið börn í sínu trúboði. Börn eiga ekki að þurfa að standa í því að frelsa fólk og boða trú, og hvað þá að láta skella hurðum á nefið á sér. Má ég þá heldur biðja um mormónana, sem eftir því sem ég hef best séð eru upp til hópa bráðhuggulegir, ungir karlmenn. Það liggur við að segja að álitlegustu herramennina væri ekki að finna á plebbaskemmtistöðum landsins heldur í Kirkju Jesú Krists hinna Síðari Daga Heilögu. Það er að segja -það lægi við að segja það ef heilbrigð skynsemi og jarðtenging væru ekki mikilvægir kostir í fari karlmanna.

Hvað sem því líður óska ég lesendum hillybillsterarinnar, nær og fjær, góðra jóla.

2006-12-23T20:11:00.000Z

Í nýju vinnunni í gær barst hljónstin Þrjú á palli í tal. Ég varð auðvitað að koma því á framfæri að ég tengdi hana alltaf við rigningu í Kópavogi og þá ekki síst í Kópavogsstrætó. Og í kjölfarið varð ég að útskýra hvernig sú tenging væri til komin. Einhverra hluta vegna er þetta gjarnan það fyrsta sem fólk lærir um mig. Það er að segja að mér finnist Þrjú á palli minna á rigningu í Kópavogi, og að mér þyki fátt hráslagalegra.
Spurningin er bara, ætli lesendur hillybillsterarinnar hafi fengið fregnir af þessu?

2006-12-22T12:59:00.000Z

Stundum fer ég í sérstakan femínistafíling og nú er ég í svoleiðis. Ekki af neinni sérstakri ástæðu svosem, heldur bara af því bara. Og það er að sjálfssögðu mjög gott mál í alla staði.

2006-12-20T10:34:00.000Z

Aðfangadagskvöld, fyrsta aðfangadagskvöld -er eldvarnahátíðin mest (réttur texti: ... er enn barnahátíðin mest)

Mér hlakkar svo til (réttur texti: Ég hlakka svo til)

Ég kemst í hátíðarskap þó úti séu snjókarlar (réttur texti: ... þó úti séu snjór og hrak)

Þetta eru þær laglínur sem ég man eftir að hafa misskilið í jólalögum og það gleður mig að tilkynna að ég ætla að fara að gefa út plötu með þessum hérna.

2006-12-19T10:26:00.000Z

Næstum alltaf þegar ég rifja eitthvað upp frá því að ég var barn tek ég fram að þá hafi ég verið 5 ára. Og atburðir sem áttu sér stað þegar ég var unglingur eru alltaf undir formerkinu "þegar ég var 13 ára og var með teina..". Og í síðgelgjunni -þá var ég alltaf 19 ára.
Einkennilegt hvað maður er takmarkaður. Vitaskuld getur maður ekki alltaf munað hvað maður var akkúrat gamall þegar ákveðnir atburðir áttu sér stað, en einkennilegt hvað maður festist bara í ákveðinni tölu. Það er of stutt síðan ég var 20 ára til þess að ég sé komin með ákveðinn aldur á líf mitt frá menntaskólaútskrift fram að þrítugsaldri -enda stendur það tímaskeið í lífi mínu yfir akkúrat núna. Það verður samt forvitnilegt að heyra í mér árið 2013, 33 ára gamalli konunni, tala um þau tíu ár í lífi mínu þegar ég var... tjah.. 24?

2006-12-18T10:07:00.000Z

Versti pólitíkusinn
Eins og svo oft áður fór ég eitthvað að hugsa um pólitík og velti því fyrir mér hvort það væri hægt að útnefna versta pólitíkus dagsins í dag, og þá án þess að tekin sé afstaða til stjórnmálaskoðana viðkomandi. Mér detta nokkrir í hug:
Jakob Frímann, Eyþór Arnalds, Dagný Jónsdóttir, Magnús Þór, Árni Þór Sigurðsson og Valgerður Sverrisdóttir.
Ég er ekki að segja að þetta fólk (nema Magnús Þór) sé vont fólk. Þvert á móti held ég að þau séu upp til hópa vel meinandi -nema Magnús Þór auðvitað.
Spurningin er bara: Hver er verstur?

2006-12-16T18:23:00.000Z

Mér er spurn, hvort er merkilegra: nítíu ára afmæli úrelts miðjumoðs- landsbyggðaflokks sem allir leggja í einelti og enginn kýs, eða þrettán ára afmæli virðulegs fresskattar sem er í senn blíður og fjörugur?

Stundum þegar ég er að lýsa fólki bæti ég því við að viðkomandi sé altmuligtmand eða altmuligtkvinde, ef ég hef velþóknun á téðum einstaklingi. Það er því aldeilis við hæfi að segja um hann Bangsa karlinn að hann sé altmuligtkat.

2006-12-15T13:47:00.000Z

Það verður seint sagt að það sé lognmolla á fjölmiðlavinnustöðum (er það orð??) landsins. Ég byrjaði í Fróða í apríl síðastliðnum og nokkrum dögum eftir það hætti framkvæmdastjóri fyrirtækisins, nýir aðilar komu og tóku völdin og vinnustaðurinn fékk daglega umfjöllun vegna mannabreytinga og fleiri mála. Í þessari sápu entist ég í níu mánuði og er núna komin yfir á Blaðið. Og það er skemmst frá því að sá fjölmiðill er aldeilis mikið í umræðunni akkúrat þessa stundina.
Ég veit ekki hvort þetta sé alltaf svona í fjölmiðlum almennt eða jafnvel vinnustöðum yfir höfuð -þó það síðarnefnda sé reyndar ekki mín reynsla.
Kannski eru fjölmiðlarnir bara svo sjálfhverfir að þeir telja hvaða litlu vinnustaðabreytingu sem er vera stórfrétt. Kannski er þetta alltaf svona alls staðar en það leiðir enginn hugann að því nema hann sé innanbúðarmaður. Og kannski boða ég bara ógæfu. Hver veit?

2006-12-14T15:47:00.000Z

Aumingja ræfilstuskan hún ég, ég er með hausinn fullan af bómul -eða mér líður allavegana þannig. Öll holrúm í hausnum á mér eru stífluð og ég get ekki hugsað. Hjálp! Ó mig auma!

Er ráðið við þessu kannski bara að fá sér JD og hætta þessu væli?

2006-12-13T15:09:00.000Z

Já
Það er bara allt að verða kreisí í nýju vinnunni. Meira að segja svo kreisí að ég hef eiginlega ekkert að blogga um. Hvað á ég að segja ykkur? Hvað verður í blaðinu á morgun? Þið getið bara lesið það sjálf ef þið viljið komast að því..

2006-12-11T12:37:00.000Z

Pæling
Er það bara ég eða finnast mér svona dekkja- og bílaverkstæði alveg einstaklega ólekkerir staðir?

2006-12-10T19:49:00.000Z

Við Sólborg vinkona mín fórum áðan niður á Laugaveg í þeim tilgangi að kaupa jólagjafir. Eins og lög gera ráð fyrir keypti hvorug okkar jólagjöf en báðar fundum við sitthvað handa okkur sjálfum. Sjálf fann ég dýrindis skó og eyrnalokka. Kannski er þetta merki um þroskaleysi, að geta ekki sett aðra í forgang í innkaupum, en ég er samt ekkert svo viss um það. Ég var nefnilega alveg rosa glöð þegar ég fann flotta skó sem voru þægilegir og sparilegir og númer 39 og hálft -sem er mín fullkomna skóstærð. Og ég get spígsporað í þeim þegar ég fer að kaupa gjafir handa öðrum, og ég verð svo vel skædd og hamingjusöm að gjafirnar sem ég kaupi í þeim verða örugglega miklu veglegri fyrir vikið.

2006-12-09T17:42:00.000Z

Í gær fór ég á síðasta djammið með verðandi fyrrverandi vinnustaðnum mínum, en það djamm var í formi tælensks karaókíjólaboðs. Ég var bara edrú og á bíl en tók lögin La Bamba, Waterloo og Billie Jean. Held það sé ellimerki að þurfa ekki lengur að vera fullur til að syngja í karaókí. Gæti best trúað því.

2006-12-08T11:51:00.000Z

Á sama hátt og ég fyllist hálfgerðri skelfingu þegar ég sé myndir af mér, og hugsa með mér að ég líti vonandi ekki svona út í alvöru, þá líð ég næstum kvalir þegar ég hlusta á röddina mína á segulbandi. Já það gerist stundum að ég þarf að taka mig upp á segulband af því að ég tek stundum viðtöl, og ég er svo gamaldags og púkó að ég fékk mér frekar segulbandsdiktófón í stað einhvers svona rosa fíns Mp3 dæmis.
Fyrir utan það hvað ég er rám eins og strigabassi þá tafsa ég rosalega mikið, segi rosalega oft "já" á innsoginu og hikorð eru nánast annaðhvert orð sem ég segi. "Og ...addna... hvernig.. na... kom það til?" segi ég kannski. Ég skil ekki af hverju enginn hefur orð á þessu málhelti mínu.
Annars dreg ég úr skömminni yfir eigin rödd með því að spila upptökuna á meiri hraða en venjan er. Þá er röddin bjartari og barnalegri, ég missi kannski af sumum hikorðunum og þetta er fyrr yfirstaðið.
Bera sig eftir björginni, það á maður að gera.

2006-12-07T09:30:00.000Z

Áðan var ég spurð af hverju ég væri aldrei með útvarpið kveikt í bílnum mínum. Víst er að ég er sjaldan að blasta mikið í sjálfrennireiðinni, en aðalástæðan er sú að ef ég hef það kveikt þegar ég er að keyra í vinnuna á morgnanna finnst mér það öskra á mig. Og þegar ég er að keyra eftir vinnu vil ég yfirleitt bara fá að hlusta á þögnina, sem er ágætis tilbreyting.

Þetta var færsla með tilgang.

2006-12-06T10:30:00.000Z

Þegar ég fann myndina í færslunni hérna fyrir neðan datt mér strax í hug: Þessi mynd á heima með hugljúfri jólafærslu á blogginu mínu! Og ég átti kollgátuna.

Annars er tjellan bara komin með nýja vinnu eins og herforingi. Byrjar von bráðar. Meira um það síðar.

Annars verð ég að segja að mér finnast Andríkismenn stórkostlegir. Þeir segja:

Á dögunum var haldinn aðalfundur Heimdallar, félags ungra sjálfstæðismanna í Reykjavík. Aðeins um fimmtánhundruð manns tóku þátt í fundinum enda var hann aðeins opinn fyrir reykvíska félagsmenn á tilteknum aldri og auk þess haldinn á einum stað í bænum og það um miðjan virkan dag. Ekki var því við öðru að búast en fundurinn yrði fámennur og hvor formannsframbjóðandi hlyti aðeins um sjöhundruð atkvæði eða svo.

Já, skitnar fimmtánhundruð hræður? Það þýðir auðvitað að salurinn hafi verið hálftómur á mælikvarða sjálfstæðismanna. Það er raunar alger skömm að því og er auðvitað ekki neitt neitt miðað við vikulegu fundina þeirra sem eru alltaf í hádeginu á þriðjudögum þar sem yfirskriftin er: Vinstrimenn eru svín (stórkallalegur hlátur).

2006-12-05T11:29:00.000Z

Veistu ég verð bara að brjóta odd af oflæti mínu og viðurkenna að ég er komin í andskoti gott jólaskap. Serían er komin upp á glugga og ég þreif allt hátt og lágt um helgina. Bráðum ætla ég að kaupa smákökudeig og fylla heimili mitt af jólalegum ilmi. Ég sem hef aldrei verið mikið jólabarn, en það hefur jú spilað inn í að ég er of vön því að vera í prófum í desember. Jæja svona geta hlutirnir breyst.
Eigið góða aðventu!

2006-12-04T09:59:00.000Z

Um helgina sá ég myndband með Justin Timberlake á Popptíví, sem er ekki frásögur færandi nema vegna þess að ég fór að hugsa: Þetta var eitt af þessum fjölmörgu sykursætu R'n'B lögum með texta nokkurn veginn á þá leið: Baby love you are my only love your eyes are so sweet baby you are my only love. Slíkir textar munu auðvitað seint teljast frumlegir en allt í lagi; fólk þarf kannski ekkert að vera frumlegt til að koma sínum boðskap á framfæri. Vandamálið var bara það að hann JT var greinilega ekki að meina orð af því sem hann söng, af því að mótleikkonur hans í myndbandinu voru fleiri en ein og hann sagði það sama við þær allar. Þær voru auðvitað léttklæddar, temmilega tómar á svipinn og einbeittar að engu öðru en að vera eggjandi fyrir kappann. Og hann söng það sama til þeirra allra: Baby you are my only love.

Mér er spurn: Fattar gæinn ekki sjálfur hvað hann er klisjukenndur og bjánalegur? Látum það vera að hann syngi nákvæmlega eins texta og allir aðrir hugmyndasnauðir popparar -hann gæti samt alveg sýnt að hann meinti það sem hann segði. En nei hann gerir það ekki einu sinni, hann bara tekur bling bling rapparana á þetta og hóar saman hóp af hálfberrössuðum og meðfærilegum kvenmönnum til að dilla sér fyrir framan hann og ná þannig hylli hans - og gjaldfellir þar með sinn eigin boðskap.

Falla konur fyrir svona kvennabósum? Sjálf segi ég nei og ég öfunda Cameron Diaz bara hreint ekkert fyrir hennar karl. Justin Timberlake má sko ekki koma í afmælið mitt.

2006-12-02T17:00:00.000Z

Alltaf fagna ég nýjum íslenskum sjónvarpsþáttum og nýjum grínþáttum í opinni dagskrá, og í samræmi við það fagna ég sérstaklega nýjum íslenskum grínþáttum. Ég sá einn svoleiðis í vikunni, en sá þáttur heitir Venni Páer. Ég verð að segja að ég skil ekki alveg þennan gaur, Venna Páer. Er þetta einhver gæi sem á að vera að leika sjálfan sig eða..? Allavegana finnst mér blasa við að maðurinn er ekki lærður leikari og útkoman er sú að hann gæti allt eins verið að lesa brandarana upp úr símaskránni eða Sumarauka Séð og Heyrt. Mér finnst nefnilega alltaf mikil sóun þegar góðir brandarar fara til spillis sökum kunnáttuleysis þeirra sem með þá fara.
Aðalhúmorinn í þessum Venna Páer sýndist mér eiga að snúast um ranga meðferð á orðatiltækjum -þar sem hann talaði um að hitta á naglann með höfðinu og sitthvað fleira- en því miður heppnaðist það ekkert sérstaklega vel. Hið sama heppnaðist hins vegar afbragðsvel hjá Bibbu á Brávallagötunni sem Edda Björgvins lék, en ég hló mig máttlausa þegar hún talaði um að hún mætti naga sig í handakrikana yfir einhverju og sæti eftir með súrt eplið.
Ennþá fyndnara er þó þegar fólk, sem notar orðatiltæki til að hljóma gáfulega, fer kolvitlaust með þau. Ég má til með að segja frá einum fyrrverandi manni ónefndrar frænku minnar. Við skulum kalla hann dulnefninu Vaff Gé en það dulnefni hefur þó ekkert með pólitík að gera (-enda er maður, sem býr í einbýlishúsi í Garðabænum (sem hann er búinn að borga upp) og er sárþjáður og niðurbrotinn yfir því að bílskúrinn rúmi ekki þrjá hömmera samtímis, fjandinn hafi það ekki mjög líklegur til að vera heitur stuðningsmaður Vaff Gé).
Sá maður var einu sinni í svo miklum bobba að það var hreinlega allt í lamaslysi hjá honum. Raunar var ástandið svo slæmt að hann komst ekki upp í nefið á sér. Ekki svo löngu síðar kvartaði hann undan því að það gengi allt gjörsamlega á afturendanum.
Stundum varð hann svo pirraður á látunum í krakkaskrílnum að hann sá sig knúinn til að kunngjöra: "Krakkar, þið keyrið mig brjálaðan!"
Um einhvern sem að hans mati var alveg sér á báti sagði hann: "Hann er bara einn úti á báti að róa."
Þegar hann keypti einu sinni ljót úr í útlöndum handa krökkunum sínum sem þau fúlsuðu við benti hann þeim hróðugur á að þessi úr væru að ríða eins og heitar vöfflur um alla Evrópu.

2006-12-01T11:21:00.000Z

Andrésblaðaminning -af því að þetta rifjaðist upp fyrir mér.

Einu sinni í Andrésblaði voru einhverjir bófar að eltast við Andrés, og eltu hann alla leið niður á Ólympíuleikana. Hann hljóp inn á leikvanginn þar sem fram fór keppni í hlaupi, og öryggisvörður stöðvaði hann með orðunum: "Þetta er bara fyrir þátttakendur."
Og Andrés svaraði að bragði: "Já en ég er þátttakönd!"

Góða helgi.

2006-11-30T11:20:00.000Z

Eitthvað var ég stressuð og illa fyrir kölluð í gær og þess vegna datt mér í hug að það gæti verið sniðugt að selja sál mína á ebay. Þá gæti ég kannski fengið monnínga og um leið komið mínu stressi og sálarlífi yfir á aðra. Eða eitthvað.

En núna er brjáluðu törninni, sem ég hef staðið í í vinnunni, senn að ljúka og við taka kristilegir vinnudagar frá níu til fimm eins og ráðgert er (í stað níu til tuttugu og tvö á milli andvökunátta). Og þegar fólk spyr mig núna hvað sé að frétta ætla ég ekki að gefa til kynna á séríslenskan máta að það sé allt í blússandi siglingu, það er, með því að segja á innsoginu að það sé allt brjálað að gera. Nei það verður bara same shit different day og ekki orð um það meir.

2006-11-29T10:08:00.000Z

Það eru rosalegar pælingar í gangi hjá mér í dag:

Meira um það síðar.

2006-11-28T12:00:00.000Z

Að gefnu tilefni
Ég tek öllum athugasemdum við mínum færslum fagnandi, hvort sem hlutaðeigendur eru sammála mér eða að rökræða við mig og hvort sem ég þekki þá eða þekki þá ekki. Eina krafan sem ég geri og þarf stundum að minna á, er að fólk skrifi undir nafni. Ég get ekki skyldað neinn til að gera það en mér fyndist ákveðin kurteisi að virða þá ósk mína. Eina undantekningin sem ég geri er fyrir hann Armstrong nokkurn, en hann er á sérsamningi hér.

2006-11-26T18:15:00.000Z

Áðan var ég í 10-11 að kaupa pungsveittan þynnkumat, og þá sá ég áminningu þess efnis að í dag væri alþjóðlegi "kaupum ekkert" dagurinn. Þar kom meðal annars fram að árlega dæju tugþúsundir kapítalista úr offitusjúkdómum í heiminum. Ég hugsaði með mér; ég get svosem alveg sleppt því að kaupa eitthvað í dag og lagt þessu framtaki þannig lið. En svo minnti ég sjálfa mig á að ég er vissulega ekki kapítalisti þó mér þyki einsýnt að ég verði offitusjúklingur ef ég mun borða löðrandi þynnkumat á hverjum degi eftirleiðis. Og kapítalistar deyja víst jafn gjörla og fyrri daginn þótt ég stelist til að slá á sárustu þynnkuna í 10-11 á Kaupum Ekkert daginn. Ó Well.

2006-11-25T15:44:00.000Z

Þá er það staðfest
Íhaldsmenn.is hafa aldrei heyrt minnst á vaktavinnu, námsmenn og hádegishlé úr vinnu samanber eftirfarandi:

En burtséð frá þessu öllu. Hver hefur tíma til að standa úti í kuldanum og mótmæla? Er enginn að vinna?
Maður nennir eiginlega ekki að pirra sig á þessum vinstrimönnum. Þau munu líklega aldrei sjá hlutina í réttu ljósi.

Auðvitað hafa þessir hressu íhaldsmenn málstaðin sín megin. Já sei sei, sérstaklega þegar þeir tjá sig um velferðar- jafnréttis- og trúmál. Vandamálið er bara hvað þeir eru gersneyddir öllu sem heitir almenn skynsemi. Þess vegna eru þeir svona misskildir. Ja eða skildir...

2006-11-24T10:01:00.000Z

Ekki veit ég hvort allir hafi alveg fattað pælinguna hjá mér í síðustu færslu en það verður bara að hafa það. Ég fatta mig ágætlega sjálf og það er aðalatriðið.
Annars hef ég tekið eftir því á hinum ýmsu bloggsíðum að fólk er að jafna stöðu kynjanna á msn listum sínum. Og þar sem ég aðhyllist jafnrétti kynjanna held ég að ég verði líka að gera hreint fyrir mínum dyrum. Á msn tenglalistanum mínum 35 konur og 25 karlmenn. Nú þarf ég að bæta við tíu karlmönnum á listann minn eða eyða tíu konum... nú eða eyða fimm konum og bæta við fimm karlmönnum.. þið þekkið þetta. Þannig að þeir karlmenn sem vilja bæta mér við sinn lista geri það, og þær konur sem vilja láta mig eyða sér sendi mér póst á hillybillster (hjá) hotmail.com.
Góða helgi.

2006-11-23T10:02:00.000Z

Í dag er pirringsblogg

Alveg fæ ég grænar bólur þegar ég heyri svona "Ekki femínista heldur jafnréttissinna"-fólk segja si svona: "Bla bla bla ég er sko ekki femínisti af því að ég vil ekki líta á okkur/konur sem einhver fórnarlömb bla bla bla".
Þar höfum við það. Ef maður dirfist að vilja jafnrétti kynjanna er maður að láta eins og konur séu fórnarlömb. Ég skal segja ykkur það. Samt sem áður hef ég aldrei litið á mig sem fórnarlamb eins né neins...!
Antí-femínistar eru bara sjálfir fórnarlömb eigin skammsýni og einfeldni og ef þeir væru ekki upp til hópa einstaklega ómálefnalegir í sínu tali um "femínistabeljur" þá hefði maður ef til vill samúð með þeim. En manngæska mín ristir ekki dýpra en svo að ég dirfist meira að segja að ranghvolfa í mér augunum þegar ég verð vitni að svokölluðum "sjálfstæðum konum" (flestar etv úr sjálfstæðisflokknum en þó ekki allar) sýna klærnar í einu skiptin þar sem þeim er það frjálst án þess að vera uppnefndar frekjur. Nefnilega þegar þær eru að verja karlaveldið með kjafti og klóm, sem þær eru vanar, og gera blessunarlega í þökk karlanna sem deila með þeim samfélagssýn. Það er þeirra göfuga hlutverk, enda mótmæla prúðar stúlkur aldrei eða kvarta nema þegar einhver krefst jafnréttis kynjanna. Þá MÁ fjúka í þær.
Svei.

2006-11-22T10:10:00.000Z

Oft hef ég með réttu sagt að ekkert væri eins slítandi og forheimskandi eins og einhæf vinna og atvinnuleysi. Nú er ég svo lánsöm að vera í fjölbreytilegu starfi, en gallinn er sá að það er búið að vera svo mikið að gera síðustu tvær vikurnar að ég hef á þeim tíma bara komist einu sinni í ræktina. Að vísu finnast mér tarnir ágætar, en það verður þó að viðurkennast að nú bráðvantar mig líkamlega útrás. Líkaminn heldur örugglega að ég sé dauð af því að ég hef hreyft mig svo lítið að undanförnu. Ég þarf reglulega að banka í öxlina á mér til að minna hann á að ég tóri nú ennþá svo hann taki ekki upp á að kólna og stífna.

2006-11-21T12:49:00.000Z

Er of mikið að krefjast snjóleysis?
Nú er ég almennt ekki mjög vandlát. Mér finnst skammdegið vera af hinu góða, hef ekkert út á rigningu að setja og þoli alveg smá kulda. Ég vil hins vegar geta labbað um á sandölunum án þess að þurfa að vaða í ís. Er það of frekt?
Svo er ég alltaf að festa hann Dúlla í snjónum, og þarf þá að losa hann úr skaflinu á sandölunum einum fata!

PS. Fokk hvað þið verðið að lesa þessa grein. Orð í tíma töluð.

2006-11-20T10:58:00.000Z

Það skal tekið fram að síðasta færsla var samin af Kamillu systur en skrifuð af mér. Og hún er ekki sönn nema af því leyti að ég fór jú í afmæli til Önnu nokkurrar Jónu.

Yfir í annað.
Ég er farin að hafa miklar áhyggjur af því hvað ég á að gefa sjálfri mér í jólagjöf. Handa öllum öðrum get ég þess vegna föndrað eitthvað drasl úr pappamassa, en hún Ég -hún er harður húsbóndi og kröfuharður. Ég hef mestar áhyggjur af því að kaupa eitthvað í jólagjöf handa sjálfri mér sem ég verð síðan ekkert ánægð með!

2006-11-19T21:12:00.000Z

Partýjj í gær ;)
Fór í ammalispartý hjá Önnu Jónu í gær. Var óóógeðslega full! :o Og djöfull var Sella sósuð. Sjálf man ég ekki neitt en það var ýkt gaman!

Nei djóóók! LOL

2006-11-18T19:46:00.000Z

Undanfarna viku er ég búin að vera að vinna eins og herforingi, enda nóg að gera á glanstímaritaútgáfum í aðventu jóla. Já það skal ég segja ykkur. Ofan á þetta er búinn að vera nístingskuldi úti sem ég þarf svosem ekki að segja ykkur frá. Þannig að ég er ekki að grínast með að ég sé búin að vera bölvandi og ragnandi í hvívetna.
Jæja ég hef kannski ekki bölvað mikið, en ragnað þeim mun meira.

Botninum var síðan náð í gær þegar það púnteraði á einu dekkinu hjá mér. Ég sá mér ekki annað fært en að hringja í pabba og láta hann koma og sýna mér hvar varadekkið væri geymt í bílnum mínum. Þar var enginn kúplingur en sem betur fer var kúplingur á hans bíl og þess vegna gat hann lyft bílnum mínum áður en hann skipti um dekk. Á meðan stóð ég hjá og horfði skilningssljó á þetta allt saman.

2006-11-16T20:20:00.000Z

Í dag er dagur íslenskrar tungu. Af því tilefni sagði ég ekkert "fokking sjitt" heldur bölvaði á rammíslensku.

2006-11-15T09:58:00.000Z

Þessi sjálfshálparbissness er alveg magnaður. Fleiri og fleiri einstaklingar eru farnir að hafa atvinnu af því að bjóða upp á styrkingu fyrir þá sem eru stressaðir og hafa mikið að gera. Og markaðurinn virðist vera mikill fyrir svona McSjálfsstyrkingu. Í raun held ég að um milljóna á milljóna ofan bissness sé að ræða. Og ég held að þeir sem standi í þessu hljóti að vera alveg hrikalega kvíðnir, stressaðir og að drukkna í verkefnum sjálfir.

2006-11-13T10:04:00.000Z

Í gær daðraði ég við afgreiðslumann í verslun. Ég er almennt ekki mikið í slíku en af einhverjum ástæðum tók ég upp á þessu í gær svona í flippi. Það er skemmst frá því að segja að hann tók þessu bara vel og daðraði á móti. Það setti að vísu strik í reikninginn að ég var skelþunn, með úfið hár og maskara niður á kinnar þannig að ég líktist frekar sjóreknu líki heldur en réttri og sléttri konu úr Vesturbænum. En engu að síður er ég ánægð með eigið framtak.

2006-11-12T16:58:00.000Z

Já já
Í gær var ég ofurölvi ásamt fleiri kommatittum úr Fylkingunni eins og stundum áður. Einn kollegi trúði mér fyrir því að hann þættist vita að ég ætti ansi skrautlega fortíð í karlamálum. Ég mátti til með að spyrja hver hefði verið að slúðra í hann um mig. En hann sagði að enginn hefði verið að því, hann bara vissi, verandi sjálfur stjórnmálafræðinemi, hvað fólk úr okkar stétt væri drykkfellt, ruglað og lauslátt og bætti því við að hann væri það einmitt sjálfur. Og þessar alhæfingar eru reyndar á rökum reistar og vel þekktar.
Ég man samt eftir því þegar ég var einu sinni á galeiðinni og hitti einhvern hagfræðing sem sagði mér að það væri á allra vitorði að stjórnmálafræðingar væru drykkfelldir, ruglaðir og hægrisinnaðir. Þá brást ég ókvæða við og benti honum á að það væri ljótt að uppnefna okkur sem hægrimenn því það værum við ekki. Gott að það leiðréttist þar með.

2006-11-10T14:53:00.000Z

Í gær var ég eitthvað að gramsa í fataskápnum og rakst á pils sem ég keypti fyrir lifandis löngu og hef ekkert notað. Eitthvað var ég að furða mig á því að hafa ekkert notað það þar sem það lítur bara vel út, þannig að ég ákvað að máta það. Þá rifjaðist upp fyrir mér að það er í raun eins og gardína sem hangir niður eftir lendunum og lætur mig líta út eins og einhverja fóstru af gamla skólanum. Já eins og svona mjaltakonu af Bóli, Staðastað.

En þetta var svona útúrdúr.

Aðalmálið er að þið mætið í prófkjör um helgina og kjósið rétt

Góða helgi.

2006-11-09T14:26:00.000Z

Mér skilst að ég verði að fara að taka upp þennan stíl í spinningtímunum:

Ég sel það ekki dýrara en ég keypti það.

2006-11-08T12:12:00.000Z

Byltingarkenndur jöfnuður
Við jafnréttissinnarnir erum alltaf að kvarta og kveina við lítinn fögnuð spámanna á hægrivæng stjórnmálanna. En jafnréttisbarátta kynjanna er mikilvæg og snýst ekki síst um tvennt:
a)Karlmenn fá hærri laun fyrir sömu vinnu en konur
b)Útlitsdýrkunin getur gengið út í öfgar og sjálfssagt þykir orðið að konur leggist undir hnífinn til að ná hinu fullkomna, staðlaða útliti.

Mér dettur í hug: Hvernig væri ef við settum á fót svona ríkisrekna alhliða útlitslögunarstofnun fyrir konur, sem væri fjármögnuð af sérstökum skatti sem lagður væri á karlmenn? Sá skattur myndi miðast að því að jafna launamuninn niður á við, þannig að bæði kyn fá sömu ráðstöfunartekjur eftir skatt fyrir sömu vinnu. Með þeim peningum væru andlitslyftingar, augabrúnaplokkanir, fótleggja- og bikinívax, sprey-tan sturtur, handsnyrtingar, gelneglur, fótsnyrtingar, sílíkonaðgerðir, fitusog, trimform og fleira og fleira fjármangað.
Þá væri launamunurinn úr sögunni og við konurnar gætum hætt að hafa áhyggjur af útliti okkar þar sem lagfæringar á því myndu ekki kosta okkur neitt.

2006-11-07T12:16:00.000Z

Alveg var ég búin að steingleyma að það fer mér ekki að röfla um pólitík hér á alnetinu. Það er alltaf verið að segja að ég hafi alltaf rangt fyrir mér, þær upplýsingar síast bara svo illa inn í kollinn á mér.

2006-11-06T11:50:00.000Z

Ég er ekki rasisti, ég vil bara ekki útlendinga til landsins
-ég er heldur ekki karlremba, mér finnast karlmenn bara klárari en konur
Nú hef ég komist að því að ótrúlegasta fólk getur tekið undir það sjónarmið að "þetta fólk" (þeas útlendingar) sé hættulegt samfélaginu í of miklu magni. Gjarnan með þeim rökum að: "Ég bjó í Noregi/Danmörku/Einhverjuálíkaskítapleisi og þar voru svo mikil vandamál" -og það vandamál stafaði af HINUM útlendingunum þar í landi en auðvitað ekki þeim sjálfum. Ég get hins vegar vel trúað hæstvirtum Magnúsi Þór að í þau þrettán ár sem hann bjó í Noregi hafi allt farið fjandans út til þar í landi, enda býr hann núna á Íslandi þar sem allt er að fara fjandans til. Tilviljun? Held ekki.
Allavegana, ég hefði haldið að einungis illa upplýstir þjóðernissinnar gætu tekið undir lýðskrumið hjá Magnúsi Þór og sennilega gera þeir það flestir, það er bara leiðinlegt að vita til þess að það eru fleiri en akkúrat þeir sem finnst hann segja eitthvað af viti.

Hindrum frjálst flæði Magnúsar Þórs til landsins!

2006-11-05T14:04:00.000Z

Aldurshnigin fröken þolir ekki hafnfirskan bjór. Þetta kom í ljós á Fjörukránni í gær. Ég held ég setji frekari áfengisdrykkju eftirleiðis á salt. Að minnsta kosti fram á næstu helgi.

2006-11-03T12:28:00.000Z

Hún systla
Þegar ég var yngri var ég töluvert kirkjurækin þótt ótrúlegt megi hljóma. Ég tók töluverðan þátt í æskulýðsstarfi Háteigskirkju og söng í kór auk þess sem ég fermdist þar. Já, það er ekki hægt að segja að ástæða þess að ég snerist til efahyggju fyrir um áratug vegna vanþekkingar á kirkjustarfi eða kristinni trú, þvert á móti fattaði bara þá að það sem fullorðna fólkið kenndi mér var ekkert endilega alltaf satt.
Nema hvað, einn liður í kirkjurækninni birtist í því að þegar ég var tíu ára gömul ákvað ég að nú væri ráð að fara með litlu systur, þá þriggja ára gamla, í Sunnudagaskóla. Í dag furðar hún sig á því að ég hafi sjálfviljug og óumbeðin nennt að rífa mig upp á sunnudagsmorgnum til þess að fara með litla barnið á fund drottins, en svona var ég (og er) góð stóra systir. Og þessar ferðir voru í askana látnar því að fyndnasta saga af litlu systkini sem nokkur hefur heyrt er einmitt af fyrstu sunnudagaskólaferð okkar systra: Um helgihaldið sá kona með brúnt, hippalegt hár sem gekk í víðum mussum og spilaði á gítar. Þegar við komum heim aftur spurði mamma litla barnið: Jæja Júlía, hvernig var í Sunnudagaskólanum?
Og barnið svaraði af einlægni: Tja, Guð var ekki þarna en Jesús spilaði á gítar!

2006-11-02T11:04:00.000Z

Á næstunni mun ég skipta yfir á kommúnuna þar sem ég mun láta gamminn geysa framvegis, en þar sem ég á eftir að læra almennilega á kerfið ætla ég ekki að skipta alveg yfir fyrr en þetta er komið á hreint hjá mér.
Annars langar mig að drekka áfengisbjór næstu helgi. Hver vill drekka með mér áfengisbjór?

2006-10-31T09:33:00.000Z

Í gær lenti ég í rifrildi við konu í gufubaði í ræktinni um hvort gufan væri mis-heit eða mis-köld. Það hljómar ef til vill fáránlega en auðvitað var þetta nöldursemi þessarar konu að kenna, þar sem hún var auðvitað kvartandi yfir því að gufan væri alltaf köld -bara mismikið- og ég er yfirleitt ekki gefin fyrir slíkt röfl.
Þetta minnir óneitanlega á þegar Kamilla systir lenti í slagsmálum við einhverja meiraprófsfrauku í partýi um hvernig ætti að bera fram orðið Jägermeister, sem kom síðan í ljós (samkvæmt beturvitanum og þýskuséníinu mér) að hvorug kunni að bera rétt fram.

2006-10-29T19:57:00.000Z

Í nótt dreymdi mig að ég gæti teygt á fætinum þannig að ég gæti sett hann fyrir aftan höfuðið. Vitaskuld varð ég að prófa þegar ég vaknaði og það er skemmst frá því að segja að mér tókst það næstum því. Svo get ég setið á gólfinu með beina fætur og snert hnén með enninu. Já, manni er ýmislegt til lista lagt.

2006-10-28T16:40:00.000Z

Já hæ
Stundum langar mig til að brjóta alla spegla heimsins. Það er alveg hræðilegur ljótudagur í dag, vá ég held ég hafi ekki litið svona illa út síðan árið sem olían fraus. Viðkvæmum er bent á að þeir horfa á mig á eigin ábyrgð.

2006-10-26T11:07:00.000Z

Þegar ég er kvefuð hrýt ég eins og ..eh.. hrútur auk þess sem engu er líkara en að ég sé andsetin í svefni. Ég fæ nefnilega alltaf svo hryllilegar martraðir sem ég vakna þó blessunarlega upp úr fljótlega sökum hósta og hrotna. Því má með sanni segja að ég er illa sofin og jafn illa fyrirkölluð þessa dagana.

Af því tilefni skora ég á ykkur að skrifa undir hér

2006-10-25T15:40:00.000Z

Ótrú-fokking-legt
Á hverjum degi heyri ég ný rök með hvalveiðum, og þau verða alltaf verri og verri með hverju skiptinu. Ég held sveimér þá að fólk sé endanlega gengið af göflunum.

2006-10-24T11:06:00.000Z

Lengi hef ég verið mikil áhugamanneskja um lögfræði- og löggudrama hvers konar, það er að segja í sjónvarpinu. Slíkir þættir eru að vísu afar misgóðir, til að mynda finnst mér CSI:Miami ekki vera mönnum bjóðandi sökum yfirborðskenndar, fyrirsjáanleika og klisjukenndra karaktera, en CSI:New York og allir Law and Order þættirnir og fleiri eru hin besta skemmtun. Eitt virðast þó allir amerískir þættir af þessari gerð eiga sameiginlegt, og það er stöðluð mynd af útlendingum.

Útlendingar, sérstaklega frá fátækum löndum í langtburtistan eiga eftirfarandi sameiginlegt í þessum þáttum, nánast án undantekninga:

-Þeir eru mjóróma og veiklulegir
-Þeir tala málfræðilega bjagaða ensku en virðast ekki eiga í miklum vandræðum með flókin orð. Dæmi: "He criminal. He have emotional disorder."
-Ef þeir eru í hlutverki glæpamanna iðrast þeir einskis, enda ekki siðaðir menn að hætti amríkana.
-Þeim tekst alltaf að koma að orðunum: "Amjéríka -ðe lend off ðe frí"

UUUgghhh *kjánahrollur*

2006-10-23T15:27:00.000Z

Um daginn var ég í flugvél að deila sögum af vandræðalegum uppákomum með samstarfsfélögum. Ég ákvað að það væri við hæfi að tala um vandræðaleg augnablik á vinnustaðnum þannig að ég rifjaði upp það sem hefur verið mér einna verst á þessum mánuðum sem ég hef unnið þarna en það var þegar ég fattaði allt í einu, eftir að hafa spígsporað um húsnæðið þvert og endilangt, að ég var með pilsið gyrt ofan í sokkabuxurnar að aftan. Ég man að ég var þá í nælonsokkabuxum og minnir að ég hafi líka verið í G-streng, þannig að ég hafði semsagt sprangað um á rassinum í einhvern tíma án þess að nokkur segði neitt. Viðmælendur mínir, sem heyrðu þessa sögu, héldu að ég hlyti að vera að tala um vandræðalegasta augnablik ævi minnar og jesúsuðu sig í bak og fyrir. En neeeei það er nú eitthvað síður, mér fannst þetta alls ekkert það vandræðalegasta sem ég hef lent í á ævi minni, ef svo væri ætti ég gott! Það segir kannski ýmislegt um mig og mín hrakföll...

2006-10-22T16:59:00.000Z

Áðan var ég úti í ónefndri matvöruverslun sem væri ekki frásögur færandi nema af því að blessaður drengurinn sem afgreiddi mig var alveg miður sín úr óöryggi við mig. Hann skalf á beinum, svitnaði og stamaði þegar hann tók við vörunum mínum og stundi upp úr sér verðinu. Það er mjög skrítið þar sem ég var ósköp stillt og prúð en ekki bandbrjáluð gribba eins og sumir. Ég held að ég hafi aldrei séð neinn eins miður sín nærri mér nema þegar fólk hefur verið að drulla upp á bak í rökræðum við mig um pólitík, en þá geri ég í því að virka þrjátíu sinnum grimmari en ég er.
En nú er sú þykjustugrimmd greinilega farin að smitast frá pólitísku argaþrasi mínu yfir í hversdagslega atburði á borð við matarinnkaup. Þarf að fara að vera eins og smér.

2006-10-21T21:39:00.000Z

Mikið er notalegt að vera heima og gera ekkert heila helgi. Það er yndislegt að geta verið latur, og þó ég hafi vaknað í morgun til að fara í spinning tíma ætla ég að sofa út á morgun og vakna óþunn. Það er lúxus sem ég hef ekki leyft mér lengi. Reyndar fylgir sá böggull skammrifi að ég er farin að fá sinadrátt endrum og eins, en þeir sem til þekkja vita hversu sársaukafullir þeir geta verið. Ég man ekki alveg hverjar orsakir sinadrátta eru, einhvern tíman heyrði ég minnst á vítmínskort, ætli það sé ekki bara satt.
Ef til vill ætti ég samt ekki að kvarta. Sinadráttur er betri en enginn dráttur.

2006-10-20T22:40:00.000Z

Magnað
Fór til spámiðils í dag. Ég veit að ég er skeptískari en andskotinn en ég bara gat ekki slegið hendinni á móti miðilsspá þegar mér bauðst slík á silfurfati. Nema hvað, ég fékk fallega lýsingu á mínum persónuleika sem ég vona að sé í samræmi við raunveruleikann. Framtíðarspána ætla ég að halda fyrir sjálfa mig, en ég get sagt að ég fékk að vita að ég er með eplagræna áru og að einhver ungur karlmaður ku vera hrifinn af mér. Rakin snilld alveg hreint.

2006-10-20T09:39:00.000Z

Myndablogg
Var að fatta að mér finnst skemmtilegt að skoða síður með myndum inn á milli og því hef ég ákveðið að taka upp á að setja inn myndir frá ferðalögum síðustu tveggja helga. Af því að nú er aftur komin helgi!
Hér gefur að líta leigubílinn í Hrísey. Aftan á þennan traktor var svona vagn dreginn þar sem við jafnaðarmennirnir hrúguðust saman undir hundateppum.
Frökenin á þessari mynd mun nú seint teljast árennileg, en myndin er tekin á Riverbank Park Plaza hótelinu í London þar sem fram fór árshátíð Birtíngsfólks þar sem fólki var att saman í spurningakeppni. Ég held að þessi mynd hafi verið tekin rétt fyrir risamarblettinn -eða rétt á eftir.

Góða helgi

2006-10-19T12:38:00.000Z

Valkvíði
Eftir að ég lýsti því yfir að ég væri orðin leið á bloggernum hafa nokkrir aðilar þrýst á mig að færa mig yfir á blog.is auk þess sem mér hefur verið boðið að færa mig yfir á truflun.net og kommunan.is. En ég get ómögulega valið auk þess sem ég er svo fastheldin á gamlar hefðir að ég flippa bara við tilhugsunina að færa mig um set. Það verður spennandi að sjá hvar ég enda.

2006-10-18T12:37:00.000Z

Vinstrisinnaðri en Stalín
Já það er ég samkvæmt þessu. Munurinn á okkur Stalín er ekki sá að ég sé meiri kapítalisti, ó nei, heldur er ég bara meiri frelli. Sjitt.

2006-10-18T09:34:00.000Z

Ég tek til baka yfirlýsingar síðasta pósts, þær voru liður í hefnd. Þið vitið nú sum hversu hefnigjörn ég er. En enginn á skilið að vera uppnefndur íhaldsmaður -nema auðvitað þeir sjálfir.

Yfir í alvarlegri nótur: Ég er komin með afstöðu mína gagnvart hvalveiðum á hreint: Ég er á móti þeim

2006-10-17T09:44:00.000Z

Leyniþjónusta Sjálfstæðismanna
Leyniþjónusta hægrimanna á Íslandi teygir anga sína víða. Ég komst nefnilega að því á Akureyri um helgina að einn úr röðum framkvæmdarstjórnarmeðlima Ungra Jafnaðarmanna er í raun kristilegur íhaldsmaður í dulargervi. Við erum að tala um að ungi maðurinn er ekki bara kapítalisti (titlar sig "hægrikrata"! Hvers konar ónefni er það eiginlega? Það er næstum jafn firrt og hugtakið "hægri grænn"!) heldur kom upp um sig þegar við vorum að rökræða þróunarkenninguna og hann sagði hana vera hina mestu fásinnu. Nú svo hafði hann sínar meiningar um "þetta fólk" (og vísaði þar að sjálfssögðu í fólk af erlendum ættum) og tókst að banna mér að keyra á mínum eigin bíl aftur til byggða á sunnudeginum þar sem hann taldi víst að kvenfólk væri í eðli sínu óæðra karlmönnum og gæti því meðal annars ekki keyrt á sómasamlegan hátt.
Og hver skyldi þessi útsendari vera?
Nefnum engin nöfn, Agnar

2006-10-13T10:29:00.000Z

Hver heimsborgin á eftir annarri
Síðustu helgi var ég í London eins og glöggir hafa tekið eftir, og á morgun stendur til að leggja af stað á Akureyris. Ég veit ekki með ykkur en ég sé ákveðið mynstur í þessu!
Góða helgi

2006-10-12T14:25:00.000Z

Böggur á blogger
Það er alltaf einhver böggur á þessum blogger.com. Það er spurning hvort maður ætti að fara að færa sig um set? Kannski fara á blog.is, bloggar.is, blog.central.is eða einhvern andskotann? Veit samt ekki alveg hvort ég legg í það, ég er svo íhaldssöm.

2006-10-11T09:43:00.000Z

Alveg er þetta magnað með muninn á að vera í vinnu og í skóla. Þegar ég var ekki orðin stjórnmálafræðingur (þ.e. á öllum skólastigum fram að BA gráðu) voru haustin alltaf minn tími af því að það er alltaf svo gaman að byrja aftur í skóla eftir þrældóm sumarsins. En núna? Þótt ég hafi reyndar gaman af því að gera það sem ég geri í vinnunni þá tek ég varla eftir því hvaða árstíð er. Það er bara svona: Same shit, different day. Já, og verra veður líka!

2006-10-10T10:53:00.000Z

Ég hitti selebb
Þeas um helgina

og

Stundum segja myndir meira en mörg orð.

2006-10-09T10:40:00.000Z

Hjálpi ykkur allir heilagir ef þið föttuðuð ekki að síðasta færsla var grín!

Annars kemur ferðasagan hér með myndum.

Ég var í London

Þar fékk ég stærsta marblett sem ég hef á ævi minni fengið.
Skýring: spurningakeppni

2006-10-07T13:10:00.000Z

Nu er eg stodd i London og loksins get eg talad vil folk sem talar mal sem eg skil, eg er audvitad ekki mikid fyrir ad tala Icelandic, enda er thad ykt hallaerislegt. Er stodd a Oxford street as we speak og adan sa eg mann sem var med svona towel a hausnum, held hann hafi verid muslimur. Svo er eg buin ad sja nokkra svertingja lika, meira ad segja svona alvoru svertingja, eins og i biomyndunum. Eg meina hvad er thetta med folk sem er ad koma hingad og adlagast ekki? Svo lifir thad bara a okkur hinum!
Jaeja, eg er ad fara i big party, svona Islendingaparty. Og mig langar sko ekki aftur heim i kuldann og dyra alcoholid heima a Iceland.

2006-10-04T19:55:00.000Z

Ég þakka góða þátttöku í kosningunni um ljótasta svæðið á höfuðborgarsvæðinu. Mér sýnist Garðabær hafa vinninginn enda virðast fleiri vera sammála mér því að ljótur, nútímalegur arkítektúr, einbýlishús, hömmerar og vandræðaunglingar séu svooo 2001. Sjálf get ég eiginlega ekki svarað spurningu minni. Ég meina Hamraborgin er ljót, en þó er hún svo sovésk í útliti að það er eiginlega bara fyndið. Hlemmur er líka ljótur en samt svo mikið kennileiti í Reykjavík að hann hefur sinn sjarma. Höfðar og hálsar eru ömurlegir en ég held að bráðum flytji minn vinnustaður af Höfðabakka á einhvern skárri stað þannig að það þýðir ekki að fást um það. Súðavogur og nágrenni eru náttúrulega kapítuli útaf fyrir sig en hver fer þangað hvort eð er?
En Skeifan... jæja ætli hún hljóti ekki mitt atkvæði. Hverjum datt í hug að nokkrar ljótar skemmur með engu nema bílastæðum og hringtorgum á milli sín gætu verið aðlaðandi verslunarsvæði? Ég sé mann í anda fara að rölta í Skeifunni svona á góðum dögum.

En hvað er ég svosem að spá í því? Ég er að fara til London um helgina og kannski sé ég eitthvað ljótt þar. Buckingham palace ef til vill. Markmiðið er að eyða ekki meiri peningum þar í borg heldur en ég myndi gera ef þetta væri venjuleg djammhelgi heima í borg óttans. Gangi mér vel.

2006-10-03T09:30:00.000Z

Hvert er ljótasta svæðið á höfuðborgarsvæðinu?

Svarmöguleikar:

a)Hlemmur
b)Skeifan
c)Garðabær eins og hann leggur sig
d)Höfðar og Hálsar
e)Hamraborgin í Kópavogi
f)Súðavogur og nágrenni

Svar óskast.

2006-10-01T18:54:00.000Z

Er þetta eðlilegt?
Fór í afmæli til Magga Töff og Fanneyjar í gær og varð nógu ölvuð til þess að skora á mann og annan í pílukasti og billjard, skíttapa og vera slétt sama. Um seinni hluta kvöldsins veit ég ekkert nema að ég hef greinilega ekki hitt á rúmið þegar ég lagðist til hvílu. Vaknaði nefnilega í morgun skjálfandi úr kulda í fósturstellingunni á gólfinu við hliðina á rúminu mínu.

2006-09-30T16:19:00.000Z

Nöldr nöldr nöldr
Í dag er ég svo sannarlega til í að nöldra og ég skal segja ykkur það.
-Síðastliðið fimmtudagskvöld var ákveðið í samstarfi við einhverja trjáknúsara að slökkva öll götuljós í bænum og sjá hvort það yrði ekki niðamyrkur. Þar sem ég er mikill nátthrafn og kann ákaflega vel við mig í myrkri ákvað ég að fara í hálftíma göngutúr nálægt heimili mínu að Norðurstíg til að njóta þess þegar það væri í boði. Ég sá þegar ljósin voru öll slökkt, en við þetta tilefni datt auðvitað öllu úthverfapakkinu í hug að bruna inn í miðbæ á hömmerunum sínum með háu ljósin á, svona til þess að þeir sæju vel myrkrið. Þeir lýstu allar götur miðborgarinnar alveg hlessa yfir því að sjá hvergi þetta umtalaða myrkur.
Það er svona að vera með uppákomur í Reykjavík. Eins skemmtilega og þær hljóma jafnan þá þýða þær iðulega að hömmerplebbar úr einbýlishúsahverfum úti í Rassíbala flykkjast niður í siðmenningu, kvarta undan þrengslum og plebbast eins og vitfirringar.

-Þessa helgina ákvað líkamsræktarstöðin mín að vera með eitthvað heimskt fjúsjon festival. Einhverjir rosa frægir líkamsræktarþjálfarar frá úglöndum (hvorki meira né minna) komu og sjá um kennslu á missniðugum eróbikksporum alla helgina. En það er ekki nóg með að það eróbikk sé ákaflega bjánalegt og mikið '93 (trúið mér ég asnaðist til að prófa það í gær) heldur þá falla niður gömlu góðu tímarnir samkvæmt stundaskrá. Því missti ég af hinum vikulega 90 mínútna spinningtíma í dag, en þeir eru ómissandi byrjun á hverjum laugardegi hjá mér. Svo er stöðin auðvitað pakkfull af pakki sem ákvað að fyrst þetta er svona rosa fínt festival þá yrði það að mæta í ræktina, sem það hefði aldrei gert annars. Þess vegna komst maður varla í eitt einasta tæki ofan á allt annað.

Úthverfaskríll: Haldið ykkur uppi á heiði!
Sófadýr: Ekki ákveða allt í einu öll í einu að troðast í líkamsrækt og vera fyrir mér, hvort sem það er festíval í gangi eður ei!

Jæja þá er biturleiki fráfarandi mánaðar kominn í stafrænt form, njótið vel.
Ég ætla að fagna með því að kíkja út á lífið í kvöld.

2006-09-29T09:31:00.000Z

Eh... grín!

2006-09-28T09:30:00.000Z

Fékk þessi skilaboð á mæspeisinu:

Hello Beautiful,

We are looking for the World's Most Beautiful Woman and we would like to extend an invitation for you to participate. Invitations of this nature are only offered to potential Contestants of your caliber. Central Casting Corp is conducting the world's first international online beauty pageant called "In Search of the World's Most Beautiful Woman®". It's a beauty pageant unlike any other. We are also expecting to enter negotiations with a major television network regarding a potential television series. We ask that you visit http://www.TheWMBW.com or my myspace account for more information. I have sought you out on myspace because I believe you are a great candidate for our competition. To join up, just visit our web site and click on the join now button.

We would love to have you aboard! Please feel free to email me with any questions or concerns, I will be more than happy to help you out.

Kyle Bohna
Vice President
Central Casting Corp.
http://www.TheWMBW.com/

Og ég tek þessu auðvitað mjög alvarlega og ætla að taka þátt. Þarf ég ekki að fara í hárgreiðslu og förðun og fara í prófessjónal myndatöku? Á hverju á ég að segjast hafa áhuga? Vil ég heimsfrið?

2006-09-27T09:52:00.000Z

Í dag ætla ég að lifa svolítið villt.
Eða eins villt og ég á annað borð get lifað þessa dagana. Ég ætla nefnilega... já bíðið þið bara... ég ætla... að.... Sleppa að mæta í ræktina!!

2006-09-26T10:16:00.000Z

Ég segi það og skrifa!
Ef ég væri vopnaóður ofbeldisseggur væri ég í þessum töluðu að ganga berserksgang niðri í bæ með haglara að drita niður stöðumælaverði

2006-09-25T10:17:00.000Z

Eh... jei!
Jæja, ríkisstjórnin ætlar að lækka matarskatt. Sumir vilja meina að fyrir vikið lækki verð á matvælum. En ég hef enga trú á því. Þetta mun einfaldlega þýða að verslunareigendur halda sömu háu verðunum og hafa verið í gangi en fá tækifæri til að halda stærri hluta þeirra fyrir eigin vasa. Ég hef engar "áhyggjur" af því að maturinn okkar eigi eftir að kosta neitt minna eða starfsfólk verslana fari að fá mannsæmandi laun fyrir vinnuna sína. Nei, það verður byrjað á þykjustuverðstríði milli búðanna en svo fáum við "gömlu góðu" verðin aftur, og búðareigendur fitna en ríkiskassinn rýrnar.
Svei

(ég hef verið kölluð kommúnisti fyrir þessa dómsdagsspá mína)