Ég er fjöldaframleidd!
Ég er búin að komast að því að ég á tvífara út um allt. Þegar ég var nýbyrjuð að vinna hérna á Klöppinni spurði einn Þýskari mig hvort ég hefði komið til Frankfurtar (sem ég hef ekki) því að hann hefði oft séð mig þar. Þegar ég fór til Ítalíu fyrir 4 árum sá ég stelpu sem minnti mjög svo á mig, mér brá eiginlega bara og sá að henni var ekki mjög skemmt heldur. Þegar ég bjó í Þýskalandi (líka fyrir 4 árum) heyrði ég oft og mörgum sinnum að ég væri alveg sláandi lík Viktoríu Svíaprinsessu (sem ég er reyndar alls ekki sammála). Ég hef heyrt frá ýmsum aðilum sem þekkjast ekki neitt að ég eigi tvífara í Kópavogi sem er af erlendum ættum. Og nú rétt áðan var einn Svíi hér á hótelinu að fullyrða að ég ætti tyrkneska tvíburasystur sem ynni í búð rétt hjá hans heimili í Stokkhólmi.
Ég skrifa þetta allt á föður minn, hann var víst svo mikið að ferðast á sínum yngri árum. Ég efast þó um að hann hafi meikað alla leið í Kópavoginn.
posted by Hildur at 1:44 PM

Ég auglýsi hér með eftir stúlkunni í twixauglýsingunni sem reyndar er ekki á þessum hlekk hér. Það er einhver twix auglýsing í Lögbergi með mynd af brúneygri krullhærðri stúlku sem líkist ekki mér heldur Bryndísi. Það vill svo til að ég hélt að þetta væri hún og ákvað að spyrja hana og í ljós kom að Jónsi (ekki Í Svörtum Fötum þó að hann sé reyndar oft í svörtum fötum) hélt líka að þetta væri hún sjálf en raunin var ekki sú. Ég hitti Jónsa að máli áðan (líkt og svo oft áður- en ég sleppti þó að kommentera um vindverki í þetta skipti enda þeir ekki til staðar) og okkur bar saman um að við yrðum að reyna að hafa upp á þessari manneskju sem líkist Bryndísi alveg skuggalega mikið og láta þær hittast. Kannski láta þær fara í smá skollaleik eða eitthvað.
Einhver mannvitsbrekka var svo elskuleg að skrifa í gestabókina mína og ég hef hann Bjössa sterklega grunaðan. Þetta er allavegana aðili sem kallar sig "ljónið" og þykist herfilega móðgaður yfir því að ég kalli sjálfa mig hið íslenska meðalljón hérna efst, því að auðvitað eigi maður að segja hinn íslenski meðaljón. Sko, ókei, auðvitað veit ég það, ég er búin að lifa í nánast 24 ár, og þetta er því saklaust grín hjá mér núna. En þið sem lesið; rétt upp hönd sem hélduð ekki að það væri verið að meina íslenskt meðalLJÓN??? Eða undruðuð ykkur aldrei á því hvaða "rós" er svona hugreystandi að halda á þegar eitthvað gengur á (hann hélt samt rósinni)?? Eða fannst aldrei subbulegt að tala um það þegar fólk labbar "í hægðum sínum"?? Eða pælduð í því hver þessi Raunber Vitni gæti verið?? Eða vissuð hvernig "sollablár" er á litinn (eins og kjóllinn hans Sigga í laginu "Nú er Gunna á nýju skónum)??
Kommon fólk! Ekki reyna að halda fram sakleysi ykkar!!
Annars er ég þakklát fyrir að einhver skrifi í gestabókina mína. Hingað til hef ég bara fengið eitthvað: "Hi, I'm Bob from the US, I like your website. By the way, if you wanna enlarge your penis, click www.enlargeyourpenis.com and give us your creditcard details."
En þetta var semsagt góð tilbreyting!

Góða helgi!!
-Hildur E. Einarsdóttir Blogham
posted by Hildur at 2:12 PM

Fyrir þá atvinnurekendur sem hugsanlega lesa þetta blogg þá er ég í leit að aukavinnu með skóla. Að vísu er ég ennþá á hótelinu, ég slepp víst ekki þaðan eins auðveldlega og ég hélt. Helgin sem átti að fara í djamm og tóma vitleysu fer semsagt í tólf tíma vaktir trekk í trekk. Ég ætla ekki að treysta á að þetta verði síðasta svoleiðis helgin, enda hélt ég að síðasta vinnuhelgin mín hefði verið fyrir 2 vikum. En svo bregðast krosstré sem önnur tré.
Annars sá ég í fréttunum um daginn að Geðhjálp eða einhver svoleiðis samtök væru með áform um að opna "geðveikt kaffihús", og jafnvel kalla það Kaffi Klikk. Er það ekki minn starfsvettvangur? Ég held að fólk sem fer á Kaffi Klikk geri ekki ráð fyrir síviliseruðum þjónum sem kunna að hella kaffi í bolla án þess að sulla á undirskálina eða borðið.
posted by Hildur at 2:32 PM

Í gær hitti ég Jón Sigurð á förnum vegi niðri í Odda sem er svo sannarlega ekki frásögur færandi því að ég er alltaf að rekast á manninn. Það fyrsta sem kom upp í huga minn var: "Maður er bara alltaf að rekast á hann hérna!" Og fannst ég verða að deila þeirri staðreynd með honum en mismælti mig og varð svo að orði: "Maður er bara alltaf að reka við hérna!"
posted by Hildur at 3:25 PM

Ég mæli með þessari grein af Kreml.is. Holl lesning. Ég hefði varla getað skrifað betur sjálf.
posted by Hildur at 11:35 AM

Ég er stundum að hafa áhyggjur af því að ég sé að verða svolítið "þreytt" hérna í blogginu. Ég á við, ég er reyndar ekki þreytt á að blogga, ég var það einu sinni (og varð fyrir vikið aumingjabloggari) en hætti því síðan. En óneitanlega er ég farin að hljóma pínulítið eins og biluð plata, alltaf röflandi um það sama, og þá helst hluti sem eru ekki einu sinni merkilegir þótt þeir séu sagðir bara einu sinni. Ég á stundum til að rífa mig yfir einhverju sem öðrum þykir ekkert merkilegt (ég er orðin alveg sérlega pólitísk og feminísk á stuttum tíma) nú eða velta mér upp úr einhverju sem ég hef góða ástæðu til að hafa áhyggjur að en allir hinir sem lesa bloggið mitt hugsa: "been there, done that, bought that T-shirt".
Ég má þó eiga það að ég geri ekki lengur það sama og ég gerði þegar ég bjó á Spáni, það er að vera með heimildarblogg um hvað ég aðhefst: "Eg for a diskotek i gaer og thad var gedveikt skemmtilegt. Nuna a eftir aetla eg ad heimsaekja vinkonur minar og vid aetlum ad sja Harry Potter. Oh svo tharf eg ad laera fyrir prof." Ætli ástæðan sé ekki bara einfaldlega sú að ég lifði meira spennandi lífi þegar ég var þar, alltaf að tjútta og skandalísera. En nú er það ekkert nema sofa, éta, skóli, vinna endurtekið 1000x. Svo að ég verð að finna upp á einhverju frumlegu til að skrifa.
posted by Hildur at 1:44 PM