Ómega -skýrsla dagsins.
Ungur maður frá Suður Englandi kom í viðtal og fjallaði um bakgrunn sinn. Hann á múslimskan föður og kaþólska móður, og lagði fæð á kristið fólk. Hann var hættulegur, gekk um vopnaður og stundaði vafasamt líferni. Svo einn daginn var hann í samkvæmi, og missti skyndilega bæði sjón og heyrn á umhverfið, en þess í stað birtist Jesús honum. Hann spurði si svona: "Ert þú Jesús?" Jesús jánkaði því, og spurði hann að bragði: "Veistu hvað bíður þín ef þú fylgir mér ekki?" Hin glataða sál svaraði: "Ég fer til Helvítis, er það ekki?" "Jú" sagði Jesús "En ef þú frelsast í mínu nafni bíður þín hamingja og guðsást."
Það er ekki að spyrja að því. Ungi maðurinn frelsaðist um leið í nafni Jesú Krists, og eina vopnið sem hann ber nú er Biblían. Hann boðar nú hina kristnu trú hér á Íslandi við mikinn fögnuð Ómegamanna. Þessi maður og viðmælandi hans úr röðum Krossins gerðu einnig fjárþröng þá sem stöðin býr við að umtalsefni sínu. Þeir fjölluðu um gervihnött þann sem sendir dagskrá Ómega í sjónvörp um allan heim, og foreldrar Englendingsins frelsaða voru að hans sögn miklir áhangendur gervihnatta og horfðu á útsendinguna frá landi íss og elda þar sem sonur þeirra predikaði. Ómegamaðurinn sagði að þeir fengju daglega hringingu frá fólki sem býr úti á landi og væri loksins komið með samband við umheiminn, það er að segja Ómegu, en áður fyrr gat það ekki horft á stöðina. Nú, vilji einhver leggja söfnun þeirri sem Ómega stendur fyrir lið, má sá hinn sami hringja í 5800777 og bjóða frjáls framlög. Þeir sem bjóða fram 2000 krónur eða meira á mánuði á raðgreiðslum fá að gjöf forláta skútustyttu sem myndi sóma sér á hvaða hillu sem er. Einnig er hægt að kaupa afar handhæga lyklakippu með "bænahöndinni".
Ung stúlka söng síðan fallegt lag sem hét "hreinsa mig" við ljúfan undirleik gítarleikara. Eftir þetta kom söfnunarlógóið á skjáinn og er þar enn.
posted by Hildur at 5:39 PM
Mig langar að hvetja ykkur til að skoða
þennan stórskemmtilega myndaþátt. Þarna fara saman dramatík, römm ádeila á samfélagið og hárbeitt háð.
Ég var að spá; hvernig ætli sé núna að hanga á Hlemmi um helgar eins og unglingar gerðu í gamla daga? Er eitthvað fólk á Hlemmi? Ég er orðin svolítið þreytt á skemmtistöðunum, enda eru þær meira farnar að líkjast félagsmiðstöðvum. Eða er það bara ég?
posted by Hildur at 5:39 PM
YESSS
Einn dauði er að baki (það er að segja eitt próf) og þrír dauðar eftir. Mér gekk vel í dag en ég hef aldrei verið eins viss fyrirfram að ég muni falla í prófi eins og núna fyrir Aðfó II sem er eftir viku. Ég er nú meiri vitleysingurinn.
Ég mæli ekki með því að fólk í próflestri drekki mikið af expressó á tóman maga. Ég reyndi að sofa í nótt en var alveg stjörf og gat ekki lokað augunum. Nú er ég öll rauðeyg, krumpuð og úfin. Eins gott að engir sætir strákar sjá til mín.
Smá könnun, hvort finnst ykkur meiri hálfviti, Davíð Oddsson eða Þorgerður Katrín?
posted by Hildur at 5:39 PM
Ég nenni ekki að læra fyrir próf!
En þarf samt að gera það. Greyið ég.
Veit einhver annars símann hjá David Beckham? Mér skilst nefnilega að maður geti orðið milljónamæringur eftir eina kvöldstund með honum.
Ég vil nota tækifærið og óska góðkunningjum mínum, Önnu Jónu og Herði, innilega til hamingju með litla rauðhærða strákinn sinn. Ég hlakka rosalega mikið til að sjá hann!
posted by Hildur at 7:56 PM 
Saturday, May 01, 2004
:
