Ég var að koma af félagsmiðstöðinni "Þjóbó". Þar er meðalaldur fólks svona 17 ár og stemmarinn eftir því. Það ætti að breyta heitinu úr "Þjóðarbókhlaða-Háskólabókasafn" í "Bókhlaða þess hluta þjóðarinnar sem þarf í alvörunni að læra fyrir próf -í Háskólanum!" Og svo gætu einhverjir massaðir dyraverðir í þröngum bolum staðið í gættinni og sagt við þá sem ætla inn: "Skilríki skilyrði skilurðu" og sá eini undir 20 ára sem fengi inngöngu væri kötturinn Funi. Ekki það að ég sé eitthvað brjál, ég læri aðallega heima hjá mér. Nú og svo hef ég líka verið í menntaskóla sjálf. Já og hösslað í Hlöðunni. Fyrir þá sem eru í makaleit; gleymið Hvebbanum og Vemó; Þjóbó er staðurinn til að ganga út!

Er á boðstólum um jólin. Ég hafði aldrei pælt í því fyrr en Kamilla benti á að:

"Upprunalega hugmyndin er góð, að hafa ofnbakað grænmeti með brauðbitum sem meðlæti. En hverjum datt í hug að baka það inn í fuglinum?
Var bara einn daginn einhver að borða svona og hugsaði: "Hmm....þetta er gott, en yrði nú enn betra ef þetta væri bakað inn í rassinum á einhverju fiðurféi!" ?
Þegar ég sit við hátíðarborðið og einhver tekur sig til og glennir í sundur fæturnar á matnum mínum og svo...slúúúúúpp...treður inn stórri skeið og fer að moka út úr rassinum, þá sundlar mér og verður óglatt. ÓGEÐ ÓGEÐ ÓGEÐ ÓGEÐ ÓGEÐ"

Nú skil ég loksins af hverju hún er alltaf svona lúpuleg og fýld á jólunum. Mér finnst við ættum að hætta að vera svo mikið white trash, við í fjölskyldunni, og hafa kalkún á jólunum. Ég vil frekar að við séum venjulegar íslenskar lummur. Annars er okkur ekki viðbjargandi. Við erum öll drykkfelld, vitum ekkert um tísku, sumar af okkur systrunum eiga þrjú börn með fjórum mönnum, ég geng í krumpugöllum og Leoncie-silfurskóm og við erum öll með byssuleyfi. Aðra sögu er að segja um hefðarkött fjölskyldunnar, sem er langbest ættaður af okkur öllum, af persneskum aðalsættum. Það er í raun ótrúlegt að hann skuli púkka upp á okkur.

Ég hef alltaf álitið sjálfa mig hafa gott viðskiptavit. Ég er með hugmynd sem gæti gagnast ungum og einstæðum námsmönnum/húsmæðrum eins og mér. Mér finnst að það ætti að setja á markaðinn svona koffín- og sykursprautur á próftímum. Maður bara byrjar daginn á þessum sprautum, eina í hvora rasskinn, og maður getur lært eins og herforingi allan daginn og sloppið við allt það vesen sem fylgir því að þurfa endalaust að vera að laga kaffi og japla á sælgæti. Ef ég þekki ráðamenn þjóðarinnar hins vegar rétt myndu þeir setja ofurskatt á slíkt hnossgæti (sem sprauturnar mínar eru) þannig að einungis efnuðustu búrgeisarnir hafa efni á þeim. Þannig væri líka hægt að koma til móts við skattalækkanirnar sem hinir sömu eru að græða á. En fyrst að þessar ofursprautur eru ekki komnar á markaðinn, þá er önnur leið farin til þess að fjármagna þessar skattalækkanir, og það er sú að hækka verð á áfengi, í skjóli "forvarna". O svei. Það er ekki nóg að ég og mínir kollegar græði ekkert á þessum rausnargjöfum sem skattalækkanirnar eru (sem við hefðum þó ef matarskattur yrði lækkaður), nei við þurfum að tapa og borga brúsann fyrir áðurnefnda búrgeisa enda þurfa þeir sín silkibindi og sitt kókaín. Því hverjir aðrir en námsmenn ættu skilið að hafa áskrift að brjóstbirtunni?

Það er indælt að búa í Vesturbænum. Það er stutt að labba í skólann á morgnanna og rúlla heim af djamminu á nóttunni, svo er ég búin að vingast við heilmarga ketti sem búa nálægt mér, og ég tefst alltaf við að spjalla við þá og klappa þeim á hausinn. En það er einn galli við að búa þar sem ég bý, og það er sá að ég næ ekki Ómega í sjónmartinu mínu. Sú sjónvarpsstöð hefur nefnilega oftar en ekki verið innblástur fyrir bloggskrif mín og almenn rifrildi. Það er nefnilega ansi fróðlegt að hlusta á Joyce Meier halda því fram að aukið kynferðisofbeldi sé einfaldlega afleiðing af því að konur séu orðnar lauslátar og klæði sig ekki skynsamlega, Gvendinn í Krossinum lofsyngja fyrrverandi samkynhneigt fólk sem gekk í Krossinn og losaði sig við "ókristilegar hneigðir" og halda því fram fullum fetum að allir sannkristnir menn séu hægrimenn, formann Zíonista tala um að Arabar séu ekkert slæmir ef þeir frelsast til hinnar kristnu trúar, og sjónvarpsstjóra Ómegu útskýra hvernig djöfullinn er að reyna að loka sjónvarpsstöðinni með því að senda henni reikninga fyrir útsendingarkostnaðinum.

En það er eins gott að bráðum er verið að fara að senda þessa stöð út í Mið-Austurlöndunum. Að sögn þeirra Ómegumanna er það nefnilega lenska hjá Aröbum sem hafa ekki snúist til kristinnar trúar að beita annað fólk ofbeldi, og verk Ómegu er að breiða út kærleiksboðskapinn til þeirra til að bæta heiminn. Gunnar í Krossinum kallar George Bush "bróður sinn" alveg eins og Jesús, enda myndi Jesús alveg örugglega líka ráðast inn í fjarlæg lönd ef hann væri uppi nú á dögum. Já og feiti ameríski karlinn, sem ég man ekki hvað heitir, sem er alltaf að boða fólki hófsemi; hann hefur oft komið inn á gildi þess fyrir foreldra að aga börnin sín með því að berja þau. Sjálfur barði hann oft börnin sín þegar þau voru að alast upp enda eru þau nýtir og sannkristnir þjóðfélagsþegnar. Og þegar þeim verður á í messunni nú á fullorðinsárunum fara þau til föður síns og segja: "Pabbi, þú barðir mig ekki nóg"