Helv... letinginn ég er náttúrulega ekkert búin að skrifa í háa herrans tíð, eða alveg síðan á mánudag. Ætli ég sé ekki bara að sætta mig við þá staðreynd að líf mitt er litlaust og hugur minn er steingeldur, og best er að hafa sem fæst orð um það. Allavegana hafa allir dagar vikunnar verið á þennan hátt: Vinna kl 8, heim kl. 16. Síðdegisblundur, bókarlestur, barnapössun og sjónvarpsgláp eftir hentisemi. Í bólið klukkan 12. Ekki það að mér finnist síðdegisblundur vera óæskilegur, bókarlestur þreytandi, sjónvarpsgláp tímasóun og barnapössun krefjandi, alls ekki!! Reyndar hittist félag íslenskra sauðagærna heima hjá Eddu nokkurri á miðvikudagskvöld, át sælgæti og döðlur, og planaði helgina. Svoleiðis að helgin verður sennilega vinna og djamm (Hahahahahahahahah) út í gegn. Hafið góða helgi og sjáumst hress á djamminu!
posted by Hildur at 1:55 PM

Eiginlega ætti ég að hafa fullt að segja núna af því að helgin er að baki, en því miður var helgin ekkert ógeðslega merkileg. Ég hékk aðallega heima og hvíldi mig. Maður verður nú að gera það annað slagið! Þannig að það var ekkert andskotans útstáelsi á mér eins og sumum öðrum núna! Í gær skrapp ég með Ninju, Eddu og Sólborgu á kaffihús þar sem nóg var slúðrað, en ekki skal farið nánar út í umræðuefnin hér á blogginu. Svo kíktum við niður á höfn og skoðuðum norskan kafbát. Við ætluðum að gera dauðaleit að hugdjörfum og hugumprýddum sjóliðum með roða í kinnum og bláma í augum, en í staðin var bærinn smekkfullur af amerískum túrhestum í skærgulum og rauðum "The North Face" úlpum. Þeir munduðu myndavélina óspart og tóku myndir hver af öðrum með svalan svip og fokkmerki á lofti. Ekki alveg að blífa!
Það varð svo uppi fótur og fit í gær þegar geitungur heiðraði okkur heimilisfólkið í Barmahlíðinni með nærveru sinni. Við mannfólkið lömuðumst úr hræðslu og munduðum hárspreyið, en hetjan hann Bangsi kisa hoppaði 3 metra upp í loftið, greip fluguhelvítið í lófana, borðaði hálfan skrokk geitungsins, en lét hinn helminginn sprikla á gólfinu.

posted by Hildur at 8:59 AM