Ég þurfti að keyra upp á flugvöll í morgun, þar sem faðir minn var að fara til Kölnar. Allt í lagi með það, nema hvað ég tók eftir því á leiðinni heim (þetta var sko klukkan 6 í morgun) að loftið yfir hraunbreiðunni virtist vera gult að lit! Kannski var einungis morgunbirtunni að kenna/þakka, en allavegana leit þetta út eins og loftið yfir Mexíkóborg á góðum mengunardegi. Það var bara eins og ég væri strax komin til útlanda sjálf (þeas, eins og þessir 18 dagar þartil ég fer til Madrídar væru liðnir). Svo er bara sól í dag þannig að það er einungis til að auka stemmarann hjá mér fyrir Spáni.
En Föstudagur er flöskudagur, og ef ég svík ekki loforð mín aftur verður útstáelsi hjá mér um helgina sem aldrei fyrr. Mig varðar að sjálfsögðu ekkert um það hvort ég of miklu eða of litlu stuði eða í of hallærislegum fötum. Því ég er hvort eð er að flytja út! hahahahahahaha
posted by Hildur at 3:20 PM

Þurfti ég ekki endilega að mæta of seint síðasta daginn í vinnuna! Er þetta ekki dæmigert? Það þurfti sko að hringja á mig. Reyndar var þetta bara annað skiptið í 3 og hálfan mánuð sem ég mæti of seint þannig að þetta sleppur. Ég þurfti að askvaða með töpperverið hennar mömmu (með Betty Crocker innanborðs) í rigningunni hingað upp á spítala, alveg ógreidd og ósnyrt klukkan alveg að verða tíu. Ég ætla rétt að vona að það hafi ekki verið margir sætir strákar sem keyrðu framhjá og börðu þessa hryggðarmynd augum. En kakan var vel þegin af samstarfsfólkinu og þakkaði það "Hildi litlu" fyrir sig. Taka skal fram að þessi nafngift er framför, þar sem áður var alltaf talað um mig í þriðju persónu í minni áheyrn. "Svo segirðu henni að hringja á vaktina", "Hún veit kannski hvar þetta er geymt". (Tekið skal fram að í báðum tilfellum er ég stödd innan tveggja metra, og viðkomandi veit vel af því). En jæja, ég er þó hætt að vera spítalamatur í bili! Adios Landspítali.
posted by Hildur at 12:10 PM

Ég er svikari og stend ekki við gefin loforð. Ég ætlaði að fara að djamma um helgina en gerði það ekki. SVEI MÉR!!! En tjah ég hefði hvort eð er eytt svo miklum peningum og svona.
Ég er að fara að hætta hérna á spítalanum á morgun og þarf að mæta á svæðið með köku. Ætli maður skelli sér ekki bara á eina Betty Crocker?!
8-16 vinna er alls ekki eitthvað sem hentar mér. Sérstaklega ef það er svona einhæft "reddara starf". Ég hringdi á Heimsferðir í dag og pantaði far fyrir mig og Berglindi Jó til Barcelona þann 24. september. Þannig að þið getið strax byrjað að sakna mín!
posted by Hildur at 3:28 PM