Ég þurfti aðeins að gubba áðan, ég var nefnilega að sjá/heyra nýja Júróvisjónlagið í sjónmartinu.
Þetta var reyndar afskaplega falleg froða, myndi sóma sér vel instrumental spilað af panflautuleikara.
Og lagið myndi óma í öllum heimsins Kópavogsstrætóum í rigningu.
Mér leið hálf illa að vera að horfa og hlusta á þessa vitleysu, þó svo að ég viti vel að fleiri lönd munu
koma með svona bjálfalegar tónsmíðar. En í lokin á myndbandinu er nærmynd af kerlingunni, að því
er virðist draumastúlku Jónsa, þar sem tár lekur niður vanga hennar. Og það bætti alveg fyrir alla
hörmungina sem á undan hafði farið.

posted by Hildur at 8:47 PM

MR tapaði í gæri í Gettu Betur. En þetta var drengilegt tap og gegn Borgó sem er
ekki það versta. Það hefði verið verra að tapa fyrir Verzló eða hvað þá MH!!
Nóg um það.

Ég er að fara í próf í fyrramálið í Aðferðafræði II. Ég veit að það er alltaf einstaklega
leiðinlegt að lesa blogg um það hvað fólk var að gera nýlega eða hvað það er að fara
að gera, hvað þá ef það er að taka próf. En ég verð að segja frá svolitlu skondnu.
Síðast þegar ég fór í svona hlutapróf í þessu fagi horfði ég á gamlan fóstbræðra-
þátt kvöldið fyrir próflesturinn. Þar voru meðal annars hjónin sem höfðu fundið upp
nýtt spil sem hét "Domm" og reglurnar voru eitthvað á þá leið að: "Sá sem fær
Spaðagosa, eða gosa af gagnstæðri sort, leggur allan sinn spaða undir lauf, svo
framarlega sem summa hjartaspilana er lægri en tveir hæstu tíglarnir. Og maður
ætti að safna gagnstæðum samstæðum eða spila nóló, en þá gilda tveir tvistar allt
nema í fyrstu umferð, og þá aðeins ef maður hendir tíglinum".

Daginn eftir hófst lesturinn:
"Ef ég þekki ekki frumbreytuna, finn ég leifina með
því að draga meðaltalið frá raungildum fylgibreytunnar. Óvissan er þá dreifitala
þessarar leifar; í þessu tilfelli samsvarar hún nákvæmlega dreifitölu fylgibreytunnar."
Og:
"Eta miðast við að fylgibreytan sé magnbundin (quantitative) og samfelld (continous)
eða nær samfelld. Frumbreytan getur verið eigindleg (qualitative) eða megindleg
flokkabreyta (categorical variable)."

Svona hélt þetta áfram í marga tíma, en alltaf var ég með spilareglurnar áðurnefndu
á heilanum, þannig að það er skemmst frá því að segja að ég klúðraði prófinu.

posted by Hildur at 2:07 PM

Ég var að lesa að James Bond leikararnir yrðu aldrei samþykktir í leyniþjónustuna af því
að þeir eru of háir og glæsilegir. Vekja of mikla athygli. Leynilöggur eiga nefnilega að falla
inn í fjöldann, karlmenn mega ekki vera hærri en 180cm og konur ekki hærri en 173cm.
Ég var að spá, með tilliti til þess hvað ég er "óvenju venjuleg" í útliti og á mér fjölda tvífara;
ÉG er rétta manneskjan í djobbið! Ég er ekki nema 170cm á hæð, í kjörþyngd, gæti verið
nánast af hvaða þjóðerni sem er (jæja allavegana í Ameríkunum og Evrópu), klæðist afar
einföldum og venjulegum fötum, og hef yfirleitt ekki mjög hátt í margmenni. Að vísu þarf ég
að breyta ýmsu í hegðun minni, sem gera mig stórskrýtna í augum margra sem þekkja mig.
Og hætta að segja alltaf þessa fimmaurabrandara. En þessu má redda og ég er satt best
að segja afar hissa að leyniþjónustan hafi ennþá ekki sárbeðið mig um að ganga til liðs við
sig.
posted by Hildur at 8:05 PM

Ég sé að það að vera pólitísk vekur ekki mikinn áhuga lesendanna, allavegana kvittar enginn í commentin nú
til dags þannig að ég ætla að fríska mig við og fara að tala um lífið og tilveruna. Veðrið er fallegt og stillt, það
lítur út fyrir að Tótla hafi verið bænheyrð, allavegana um stundasakir.
Ég veit ekki með ykkur, en það er kominn svolítið jákvæður próftökufílingur í mig núna. Vorpróf hafa alltaf lagst
betur í mig en jólapróf, ég veit ekki af hverju. Að vísu er ekki hægt að segja að þetta árið standi efni til, þar sem
mér finnst ég ekkert kunna. En koma tímar koma ráð. Áður en við vitum af er hitinn kominn upp í tveggja stafa
tölu og ég og allir aðrir háskólanemar (og flestir framhaldsskólanemar) sitjum pungsveitt á bókhlöðunni í jogging-
galla og með magic í bauk. Þá fyrst er kominn í mann fílingur.

Ég er á fullu að skoða fasteignir, mig dreymir um að kaupa mér íbúð í haust, eða að minnsta kosti leigja.
Allar uppástungur eru vel þegnar.
Tack och hej!
posted by Hildur at 6:33 PM

Það er ekkert réttlæti í þessum heimi!

Eða allavegana fæ ég oft á tilfinninguna að það sé ekkert lýðræði í lýðræðisríkjum. Ég var í Madríd þegar
Bandaríkin réðust inn í Írak. José María Aznar þáverandi forsætisráðherra studdi Bush í þeim aðgerðum
en eitthvað um 90% spænsku þjóðarinnar mótmælti. Á hverjum degi voru þúsundir manna að mótmæla
út um allt land, en enginn hlusti á sauðsvartan almenninginn.Nú er búið að refsa óbreyttum borgurum í
Madríd fyrir ódæðisverk sem framin voru í nafni J.Aznars, einfaldlega af því að lýðurinn fékk ekki að hafa
neitt um málið að segja. Á Atocha lestarstöðinni var ég daglega, stundum nokkrum sinnum á dag, og
Cercanías lestarkerfið sem var skotmark hryðjuverkamanna var tenging mín milli bæjarins, Alcalá de Henares
(þar sem bíllinn með sprengiefnunum fannst) og Madrídarborgar.Því stendur þessi atburður mér nær en
WTC atburðurinn gerði á sínum tíma (þótt ekki geri ég lítið úr því voðaverki).

posted by Hildur at 12:40 PM