Um daginn var ég í matarboði þar sem allir fengu ofurlítið páskaegg í desert, með málshætti
auðvitað. Það vildi ekki betur til en svo að ég fékk málsháttinn "Háð er heimskra manna
gaman". Og ég fór að hugsa. Nú er ég alltaf að beita fyrir mig hárbeittu háði svona
upp á djókið og hef gaman að. Hvernig getur háð verið heimskra manna gaman? Ég hefði frekar
haldið að það væri gáfaðra manna gaman af því að sumir eru mjög vitlausir og geta ómögulega
skilið gott háð. Ég held að hver sá sem samdi þennan málshátt hljóti að hafa mjög lága greindarvísitölu
og vera súr yfir gáfaðramanna húmor sem hann skilur ekki. Alveg eins og sá sem sagði að "Fegurðin
kæmi að innan" hlýtur að vera frekar svipljótur.

Gleðilega páska!!
posted by Hildur at 2:23 PM

Ég er með samviskubit!
Ég hneykslaðist svo mikið á niðrandi ummælum Bjössa í garð múslima hérna á commentunum
við síðasta innlegg að ég ákvað að testa hann og segjast eiga kærasta frá Líbanon sem héti
Ahmed. Til að láta hann horfast í augu við ummæli sín. En maður á ekki að ljúga að saklausum
mönnum. Afsakaðu þetta Björn!

En það er ekki þar með sagt að ég hefði djókað þetta í háði. Við erum öll jöfn fyrir Guði... nú
eða Allah... eða Belsebúb eða hverjum sem við kjósum að trúa. Þannig að ef einhver myndarlegur
maður af hvaða trú eða hvaða þjóðerni sem er les þetta þá er ég semsagt enn á markaðnum.
posted by Hildur at 2:23 PM

Hér set ég smettið á mér aftur inn. Það er svo gaman að hafa mynd af sjálfum sér á blogginu.
Já já.





posted by Hildur at 2:23 PM

Venjulega hef ég gaman af fyndnum uppátækjum, og tel mig heilmikinn húmorista, þótt
ég hlægi kannski mest og hæst af sjálfri mér. En ekki þótti mér nú fyndið hvernig DV kom
með þá hugmynd í dag að búa til bíómynd um líkfundarmálið og voru að spökulera hverjir
ættu að vera í hvaða hlutverki. Mér finnst nefnilega líkfundarmálið vera hið átakanlegasta og
örlög Litháans ekki til að gera grín að því. En mér finnst líka DV algjört sorablað, verra en
séð og heyrt. Því að þó svo að Séð og Heyrt gjammi um einkalíf fólks og brostnar ástir þá
setur DV grafískar lýsingar á morðum og barnaníði eins og fólki þyki ekki nóg að vita að svo
siðlausir og hættulegir menn séu til, heldur hafi það áhuga á að lesa um helstu smáatriði
misyndislegra verknaða þeirra.

Í gær vann Verzló Borgó í Gettu Betur. Opinberlega er mér skítsama, en mér finnst nú að
Borgó hefði átt að taka þetta af því að þeim tókst að koma MR út úr keppninni. Nú og
svo finnst mér náttúrulega ekki á montið í Verzlingum bætandi. Ég segi ekki orð um MR
snobb... Sem minnir mig reyndar á það þegar ég var einu sinni einn Sunnudagsmorgunn
klukkan 6 eða eitthvað niðri í bæ eftir ölæði og tjútt alla nóttina og hitti að máli einhvern
góðglaðan Pakistana sem kunni smá í íslensku. Hann spurði mig: "Er þú í emm err?"
Ég: "Nei ég er ekki í MR en ég var þar." Hann: "emmerr er fúllur me snobbara"
-Það er gott að þetta er það fyrsta sem útlendingar læra á Íslandi! :-D
posted by Hildur at 2:23 PM

Ég var að koma úr Ölgerð Egils Skallagrímssonar með fulla tunnu af bjór. Það vildi nefnilega svo óheppilega til þar á bæ að eitthvað rör sem dælir bjór sprakk þannig að gullnu veigarnar flæða út um allt íverksmiðjunni. Það er ekki hægt að stöðva þetta fyrr en tankurinn hefur tæmst, þannig að hinn almenni borgari má fara þarna og hjálpa til við losun með að koma með eigin ílát og taka við bjórnum, og má að sjálfssögðu eiga hann. Tékkið á þessu, við erum að tala um hundruði lítra, og þetta mun ekki tæmast fyrr en í kvöld.
posted by Hildur at 1:27 PM

Hér með tilkynnist að mér gekk ekki sem verst í prófinu sem ég var að röfla yfir um daginn. Fékk 6 sem
er ekki of galið. Bráðum koma próf og það þýðir bara að bráðum eru prófin búin, og hvað gerist þá?
Jú ég fylli ár og verð 24 ára. Það er ekki ráð nema í tíma sé tekið, og þar sem mér finnast allir
slétttölualdrar vera svo leiðinlegir þá ætla ég að gera eitthvað leiðinlegt í því. Meðal hugmynda sem mér
hefur dottið í hug eru:
1. Bingó í vinabæ
2. Sund í sundhöllinni
3. Línudansnámskeið
4. Upplestur á nútímaljóðum
5. Pungsveittar majónesbrauðtertur og marengs
6. Tónleikar með ÁMS eða Love Gúrú
7. Landabolla
8. Hanga á Hlemmi
9. Útilega í Vestmannaeyjum
10. Rigning

Eruð þið, lesendur góðir, með fleiri hugmyndir til að fullkomna ömurlegan dag?
posted by Hildur at 8:12 PM

Það er alveg sérstaklega gaman að rífast um pólitík eftir þrjá öllara eða svo og við fólk sem hefur
áhuga á að hlusta á mann. Það gerði ég í gær á Seltjarnarnesi, þar sem hressir ungliðapólitíkusar
hittust, gerðu grín hver að öðrum, tefldu, drukku og spjölluðu. Markmið okkar systranna var að
"fara á nesið og slást við jakkafataklædda SUSara" en við létum nú slagsmálin vera,
bara til tilbreytingar. Kamilla var spurð af einum Valhellingi hvenær hún myndi ganga í SUS, og svarið
var skýrt og hnitmiðað: "Þegar ég er búin að ljúka tímabilinu mínu á samyrkjubúinu."

posted by Hildur at 7:41 PM