Sjitturinn titturinn mellan og hóran!
Ég er komin með nóg af HÍ. Það hefur aldrei verið eins mikið á reiki eins og
akkúrat þetta árið hvenær og hvernig ætti að greiða skráningargjaldið. Fyrst
fengum við tilkynningu þess efnis að það ætti að gerast í lok mars -DÖ! eins
og einhverjir ættu þrjátjúst kall í rassvasanum þá. En Stúdentaráð barðist
fyrir því að fá því frestað, -klöppum fyrir því-, þar til námsmenn væru búnir
að vinna sér inn smá péning um sumarið. Líður og bíður, ég beið bara róleg
eftir gíróseðlinum sem ég er vön að fá í Júlí. En ég fekk engan gíróseðil,
það geta líka allir í fjölskyldunni staðfest þar sem allur póstur er tekinn
hátíðlega hér á bæ. En mér barst tölvupóstur frá Stúdentaráði nú um daginn
þar sem ég var minnt rækilega á að ég ætti að vera löngu búin að greiða blessaða
gjaldið og ef ég hefði ekki gert það skyldi ég hafa samband við ákveðinn mann
í Akademískri Stjórnsýslu. Ég gerði það og svarið hans var skýrt og skorinort;
"Samkvæmt Nemendaskrá ertu víst búin að fá gíróseðilinn sendan heim til þín"
Öh... nei!
"Ég skal, af því að ég er svo mikill öðlingspiltur, leyfa þér að greiða gjaldið
fyrir föstudaginn, og með 15% álagi"
(hrópað:) Þú ert gull af manni!!
"Ég bendi þér á að kynna þér vel reglur um skráningargjöld og virða þær, enda
koma þær alls staðar skýrt fram"
Alls staðar hvar? Í rassgatinu á þér? Og ef það væri ekki fyrir Stúdentaráð
yrði ég í slorinu á næstu önn mannkertið þitt, af því að þið getið ekki lúðast
til að senda mér einn fokkings gíróseðil, þótt þið haldið fram meintu sakleysi
núna. O fussumsvei.

Ég gat ekki hóstað fram þessu fjármagni enda blönk með eindæmum, þannig að ég þurfti
að biðja föður minn um lán og að hann myndi skjótast fyrir mig í Nemendaskrá enda
er ég vinnandi manneskja. Hann gerir það, tekur þá ekki á móti honum einhver
kvensniftin sem fer að ambra og malda í móinn yfir því hvað dóttir hans sé nú
mikill sauður að hafa ekki drullast til að borga fyrr. Fari það grákolað!
Sparnaðaraðgerðirnar eru auðvitað óþægilegar og sárt að stjórnvöld skuli ekki
meta háskólamenntun sem neitt annað en fjárhagslegan bagga; en það væri nú lágmark
að klúðra ekki hlutunum í takt við þær.

Eruð þið annars ekki bara hress á kantinum?
posted by Hildur at 5:13 PM

Alveg finnst mér hann Guðni litli vera óborganlegur á svipinn á þessari
mynd. Hann er þarna lengst til hægri. Ég er reyndar að fara í frí í sumar
að hitta þá bræður. Ég ætla að leggjast í víking um miðjan Ágúst og heimsækja
Ninju vinkonu og fleiri kempur í Köben, skreppa til Árósa þar sem ég á hressa
systur, flippaðan mág og tvo yndislega systursyni. Í minni gömlu heimaborg
Berlín á ég nokkra þýska vini sem ég á heimangengt hjá og í Frankfurt á ég einn
sérstakan vin. Aldrei að vita nema maður kíki til Póllands líka, það er gaman að
labba yfir landamæri og svo er áfengið þar ódýrt.
Kortið mitt í Baðhúsinu rann út í vikunni og það er ekki gott mál. Ég fór reyndar
út að hjóla í gær og í dag í tvo tíma í senn, nú og svo vinn ég fremur líkamlega
vinnu... en það dugar mér ekki. Ætti maður að splæsa á sig eins og mánuði í WC
niðri í Laugum? Hljómar óneitanlega freistandi...
posted by Hildur at 6:06 PM