Blessunarlega tel ég mig ekki þurfa að strengja nein áramótaheit. Eða hvaða áramótaheit ætti maður svosem að strengja? Ég nenni ekki að hætta að drekka áfengi eða borða sælgæti. Ég reyki ekki og hef stundað líkamsræktina samviskusamlega á liðnum árum. Einhvern tíman strengdi ég þess heit um áramót að ég myndi djamma meira á komandi ári, og stóð við það, en ég tel það ekki aðkallandi að þessu sinni þar sem slíkt gæti valdið skorpulifur. Kannski ætti ég að reyna að hætta að skrópa í tíma, byrja að læra heima eða stefna á minnst átta í öllu? Æ nei.

Því miður fyllist hins vegar alltaf líkamsræktarstöðin af áramótaheitafólki í janúar (sem er að sjálfssögðu fljótt að gefast upp). Ég vil helst ekki hafa of marga í einum hnapp í ræktinni. Ég er að spá í að hvetja fólk, sem vill hætta að verða feitt og verða mjótt, til þess að hverfa frá þeirri stefnu sinni, með því að segja: "Elskurnar mínar! Maður Á að vera feitur og fallegur! Því fleiri fellingar, þeim fleiri stellingar!!"