Heja Sverige...
Það er annars að frétta af mér að líkurnar á að ég gerist heimsborgari aftur í vor eru ekki hverfandi, þvert á móti hafa þær aukist.
posted by Hildur at 12:21 PM

Hmmmm...
Hvor greinin finnst ykkur betri, þessi eða þessi ?
Mér finnst síðarnefnda greinin (hægrivillan) af því að mér finnast hægrimenn vera krútt og nafnið mitt kemur þar fram tíu sinnum. Ég flaskaði alveg á slíku í minni grein...!
Besta setningin er samt: Nú síðast birtist grein ef Hildi Eddu sem telur ...
posted by Hildur at 12:54 PM

Aldrei slíku vant stendur ekki til að mála bæinn rauðan komandi helgi. Þess í stað neyðist ég til að þykjast vera ábyrgur háskólastúdent og taka heimapróf í Opinberri stefnumótun og skrifa eitthvað gáfulegt í BA ritgerðina. Upphaflega markmið mitt með ritgerðinni var að framleiða eitthvert meistaraverk, eitthvað sögulegt framlag til stjórnmálafræðanna, en er sannarlega hætt við það núna. Núna á bara að rusla'essu af, reyna að sleppa frá þessu skammlítið. Svona er metnaður minn hverfull.

Annars langar mig að bæta við lítilli hugvekju um yndislegan evrópskan sósíalisma. Eins og flestir vita er hrikalega dýrt að slasa sig hér á landi og í raun forréttindi hinna ríku að leita til slysó. Þegar ég var hins vegar fátækur námsmaður á Spáni lenti ég í því að slasa mig illa í hnénu, rétt áður en ég flutti aftur heim. Ég þurfti að fara í sjúkrabíl, röntgenmynd, hækjur og fleira, og var svo úthlutað endurkomutíma, án þess að seðlaveskið kæmi við sögu. Nú ég mætti í endurkomuna, búin að tæma sparigrísinn minn í trú um að ég þyrfti ekki einungis að greiða fyrir tiltekið viðtal heldur líka gamlar syndir þarna í heilbrigðiskerfinu. Eins og dæmdur glæpon, þaulvanur niðurlægingu kapítalismans í mínu heimalandi, mætti ég til móttökuritaranna, sagði til nafns og spurði si svona: "Og á ég ekki að borga eitthvað?" Konan sem sat fyrir svörum gapti í forundran, ranghvolfdi svo í sér augun og svaraði: "Borga?? Þetta er spítali! Auðvitað þarftu ekki að borga!!" Og þegar ég arkaði í biðsalinn heyrði ég hana blaðskellandi við samstarfskonur sínar: "Ameríska stelpan var að spyrja hvort hún ætti að borga eitthvað!" Og það var aldeilis fussað og sveiað.
Síðan þegar heim var komið var mér gert að fara í aðgerð á hinu sama hné, bara án áðurnefnds evrópsks sósíalisma. Hvað mátti stúlkan punga út? Átján'úst kjeeeelll!
posted by Hildur at 9:23 AM

Ég er að spá í að gerast pólitíkus eftir allt saman. Mér finnst nefnilega ekkert svo leiðinlegt að rífast, og svo er alltaf verið að bjóða pólitíkusum á fyllerí. Reyndar verð ég þó að viðurkenna að Kamilla systir mín yrði betri í pólitíkinni; hún kann ekki að rökræða við mig, því um leið og hún er búin að heyra mótrök þá öskrar hún á mig: "ERTU HÁLFVITI??? KANNTU EKKI AÐ TALA??" og svo setur hún sig í hálfvitalegar stellingar, grettir sig og gefur frá sér óhljóð og segir "Svona ert þú!!" Síðan endar hún á að berja mig í klessu.
Það væri sannarlega fútt í Alþingi ef það væri meira um svoleiðis þar.
posted by Hildur at 12:39 PM