Töffarar dagsins
Töffarar dagsins í dag, föstudagsins langa, eru tveir. Sá fyrri er amma mín sem er 78 ára gömul töffaragella. Hún drekkur vodka í toppdjús og grænlenskan landa með bestu lyst auk þess að vera sérstaklega mikil aðdáandi Austur-Evrópu. Að vísu á hún það sameiginlegt með hinni ömmu minni að vera alveg rasandi yfir því að ég sé ekki gengin út og spyr mig út í þau mál í þaula í hvert skipti sem tækifæri gefst. Þeim ber þó saman um einu mögulegu ástæðuna fyrir þessm aðstæðum mínum: "Það bara hlýtur að vera eitthvað að þessum ungu mönnum í dag fyrst að stúlkan er enn á markaðnum." -segja þær.
Áðan var matarboð og í boði að drekka var meðal annars kók og dýrt rauðvín. Ég, vill-vera heimsborgarinn, viðraði þá ósk mína að hafa næst ódýrt rauðvín á boðstólum, af því að ég hefði komist upp á lag með það á Spáni að drekka Calimucho, sem er kók og ódýrt rauðvín blandað saman til helminga og hrist. Mér finnst það herramannsdrykkur en hugmyndin hlaut lítinn hljómgrunn hjá fjölskyldumeðlimum. Nema henni ömmu. Hún sagði að þetta hljómaði hreint ljómandi vel og við ákváðum að við myndum sem allra fyrst hittast og detta í það með calimucho. Hverjir vilja koma í partýið?

Hinn töffarinn er Jesús Kristur. Nei ég er ekki frelsuð, ég er álíka hundheiðin og ég hef alltaf verið. Hins vegar held ég að Jesús hafi verið mest töff gæi í heimi af því að það er ekki nokkur spurning að maðurinn var fyrsti femínistinn sem sögur fara af!
posted by Hildur at 4:19 PM

Evróvisjón
Nú er gósentíð okkar evróvisjónnördanna. Hvernig finnst ykkur íslenska lagið? Ég er nokkuð ánægð með það af því að þetta gæti verið framlag Bosníu-Herzegóvínu að reyna að apa eftir 2 Unlimited, sem er jákvætt miðað við hvað keppnin er orðin mikil austantjaldskeppni. Ég á vin í Ísrael sem ég spjalla alltaf við í aðdraganda Júróvisjón og hann er einhver mesti sérfræðingur um keppnina sem ég þekki. Samt er hann gagnkynhneigður! Hann spáði því að Jónsi myndi lenda í 20.sæti í fyrra auk þess að vera fyrirfram með á hreinu hver efstu þrjú löndin yrðu. Ég er því miður ekkert búin að rekast á hann (Tag frá Ísrael) á msn undanfarið þannig að þangað til veit ég ekkert um hvernig laginu mun vegna. Ég læt ykkur vita!
Annars finnst mér Víkverji orða þetta ágætlega í dag; hann er óánægður með þessa eilífu meðalmennsku okkar Íslendinga, við tökum aldrei neinar áhættur af því að við erum alltaf að reyna að vera svo kúl. Svo vinnum við aldrei. Hann líkti okkar stefnu í þessari keppni við keppendur í fegurðarsamkeppni; áherslan er ekki að vera frumleg og athyglisverð heldur að vera sæt og prúð eftir samevrópskum staðli, og niðurstaðan verður fullkomin meðalmennska. Þess vegna eru Þjóðverjar, Ísraelar, Finnar, Tyrkir og allir austantjaldsmenn svalir; þeir þora að skera sig úr!
Ég segi: Pál Óskar aftur, bara miklu klúrari en áður!
posted by Hildur at 12:16 PM