Einhverjir muna kannski eftir því að ég fór upp á slysó fyrir um hálfu ári með rifna hljóðhimnu. Ég átti ekki von á að það yrði rifjað upp ógrátandi, en engu að síður er ég í smá vanda nú af þeim sökum. Málið er að þegar ég mætti á svæðið borgaði ég einhverja þúsara, nokkra svona "Binna", eins og lögmál kapítalismans gera ráð fyrir. En eftir skoðun á Slysó var ég send upp á HálsNef og Eyrnadeild til frekari aðhlynningar, og fór síðan heim. Svo núna er Landspítalinn að senda mér hótunarbréf þar sem þeir vilja meina að ég hafi aldrei borgað komugjald á HNE. Ég sendi fyrirspurn á einhverja kellingar sem höfðu sent mér bréfið, og sagði að ég hefði borgað komugjaldið á Slysó. "Ertu með kvittun til að sanna það?" spurðu þær. En ég er nú svo skammsýn að ég geymi ekki allar heimsins kvittanir mánuðum saman og tjáði þeim það. Þá sögðu þær: "Heyrðu væna. Ef þú getur ekki sýnt okkur kvittun þá bara upp með monningana góða og vertu ekkert að segja okkur ævisöguna þína um leið. Þá má geta þess að ef þú skorast undan sendum við bara löffarana okkar á þig."
(smá skáldskapur í atburðarrásinni, en þetta er engu að síður staðan).
Og nú stend ég frammi fyrir því að neyðast til að gefa mig á hendur niðurlægingar kapítalismans og punga út enn fleiri Binnum.
Kannski er þetta bara hortugheit opinberra stofnanna sem kapítalisminn einn getur bjargað okkur frá?
Það er ég viss um að við yrðum öll hamingjusöm ef við fengjum að sleppa við skatta og punga út aleigunni í hvert skipti sem við fengjum skyrbjúg eða nagla í fótinn. Eða kannski myndum við bara ekki fá neina sjúkdóma eða lenda í slysum vegna aukinnar kostnaðarvitundar? Ég hefði þá kannski aldrei brotið hné, handleggi, tær og fingur og aldrei fengið þriðjastigs brunasár eða gat á haus og/eða hljóðhimnur. Og sannarlega hefði ég örugglega aldrei fengið skaðræðishálsbólgur og þurft að láta fjarlægja úr mér hálskirtla. Það var nefnilega svo djöfulli freistandi að gera allt þetta af því að þetta var hvort eð er allt meira og minna borgað úr opinberum sjóðum. Djöfull þarf maður líka að byrja að reykja og dópa til þess að geta með einhverjum hætti haft það kósý á ríkisspenanum!
Jamm.
posted by Hildur at 10:29 PM

Ég fór á kaffihús áðan og sagði si svona við afgreiðslustúlkuna: "Heyrðu ég ætla að fá hjá þér sjö smokka"
Afgreiðslustúlkan: "Ha?? Ætlarðu að fá sjö smokka?
Ég: "Nei Sviss Mokka. Í götumáli."
Afgreiðslustúlkan (skömmustuleg): "Ji fyrirgefðu, ég misheyrði svona illa, ég hélt þú hefði sagt að þú ætlaðir að fá sjö smokka!"
posted by Hildur at 6:02 PM

Sjöhlutaklukkið

1. Sjö hlutir sem ég ætla að gera áður en ég dey:
- Læra að fljúga þyrlu
- Læra kínversku, japönsku, rússnesku og arabísku
- Skrifa kvikmyndahandrit og að minnsta kosti eina skáldsögu
- Klára masterinn. Stefni reyndar á það fyrir þrítugt
- Komast í hálaunastöðu
- Heimsækja allar heimsálfurnar
- Verða fegurðardrottning

2. Sjö hlutir sem ég get:
- Farið í splitt
- Krossbölvað á finnsku
- Fallið í trans og gleymt algerlega stund og stað. Allt of auðveldlega
- Nöldrað um pólitík... ENDALAUST
- Hlegið að fimmaurabröndurum. Líka endalaust
- Sippað viðstöðulaust í 10 mínútur. Sem er mun erfiðara en það hljómar fyrir þá sem hafa aldrei prófað
- Misst minnið. Ég segi ekki meira.

3. Sjö hlutir sem ég get ekki:
- Farið í spíkat
- Glaðvaknað fyrir klukkan 10 á morgnanna
- Hegðað mér eins og viti borin manneskja þegar ég er að reyna að koma vel fyrir
- Drukkið diet drykki, mysu, viskí og koníak
- Borðað indverskan mat, hvítt súkkulaði, kex með ávaxtahlaupi og hvers kyns súra ávexti
- Skilið af hverju fólk aðhyllist aðrar stefnur en ég sjálf í pólitík
- Verið vond við minni máttar

4. Sjö hlutir sem heilla mig við hitt kynið:
- Útlitsfegurð. Ég nefni það fyrst af því að það er það fyrsta sem maður tekur eftir en ekki af því að það er mikilvægast
- Greind. Veit líka fátt meira óspennandi en heimskir karlmenn. Nú eða heimskar kerlingar ef því er að skipta.
- Húmor. Mjööög mikilvægt
- Góðmennska. Ólíkt mörgum kynsystrum mínum fíla ég ekki ribbalda og krimma.
- Brosmildi. Segir sig sjálft
- Kattavinátta. Því þeir sem eru kattavinir eru almennt betra fólk en þeir sem eru það ekki.
- Sjálfsöryggi án snefils af hroka.

5. Sjö frægir sem heilla
- Jamie Oliver. Við erum að tala um huggulegan mann sem eldar..!
- Ewan McGregor. Þó ekki væri nema bara skoski hreimurinn!
- Iker Casillas. Markmaður Real Madríd fyrir þá sem ekki vita.
- Jason Lewis. Allavegana ef hann er eins klár og hrokalaus og persónan sem hann lék í Sex &the City
- Michael Owen. Mér finnst einhvern vegin að allir enskir karlmenn ættu að vera eins og hann.
- Albert Einstein. Hann var svo klár.
- Sókrates. Hann var svo mikill hugsuður.

6. Sjö orð eða setningar sem ég segi oft
- Ha?
- Nei djók
- Sko,... (svo kemur setning)
- Dísis
- Segðu!
- Þokkalega!
- HA??

7. Sjö hlutir sem ég sé einmitt núna
- Tölvuskermurinn
- Nýi myndavélasíminn minn
- Vel lökkuðu neglurnar mínar (var að dunda mér áðan)
- Kötturinn minn sem sefur vært og rólega
- Ikea standlampi
- Myrkrið útum gluggann
- Jólaseríu
posted by Hildur at 6:25 PM

Pollýanna
Mér er sama þótt það sé ef til vill pínu skítt að vera heima með hita en ekki erlendis og frískur eins og til stóð. Vissulega er ég hálf down yfir því og ef ég væri karlmaður héti ég áreiðanlega Hálfdán.
En það góða er hins vegar að nú í flensunni get ég lítið sem ekkert borðað, matseðill dagsins samanstendur af jógúrt, hálfum banana og einni súperdós. En það þýðir auðvitað takmarkaða kalóríuinntöku og ég verð alltaf svo mjó og spengileg í flensunni. Svona er ég shallow. Samt er ég ekki Sjalli!
posted by Hildur at 3:42 PM