heitamótaár
Áramótaheitið mitt fyrir árið 2005 var að byrja að reykja á árinu og ég hef einungis níu tíma til þess að standa við það, en satt best að segja stóð aldrei til að standa við það af alvöru -eins og flestir sjálfssagt hafa fattað.
En ég er með áramótaheit fyrir árið 2006 sem ég ætla að standa við. Ég ætla að passa að verða ekki gömul og slöpp ÞÓTT ég verði 26 ára. Og svo þarf ég víst að reyna að verða minni klikkhaus á árinu. Það er nefnilega alltaf verið að segja að ég sé svo rugluð.
Já hey svo strengi ég þess líka heit að gifta mig á árinu! Það ætla ég líka að standa við, og þótt ég sé einhleyp, trúlaus og ætli ekki að gifta mig í kirkju, þá er ég búin að ákveða prestinn, en það verður Séra Guðni Már
posted by Hildur at 3:01 PM

Ég fékk einhverja martröð í nótt eins og stundum kemur fyrir. Alltaf þegar ég fæ martröð þá er ég algerlega óforvarandis aftur orðin fimm ára . Ég held að það sé af því að ég man alltaf eftir því þegar ég fékk gubbupest jólin 1985 og átti eitt kvöldið eitthvað erfitt með svefn. Og móðir mín brá á það ráð að reyna að svæfa mig með þeim orðum að "englarnir myndu vaka yfir mér í nótt". Og blessuðu fimm ára barninu (mér) kom ekki dúr auga þá nóttina og margar nætur eftir þá, af ótta við alla þessa engla.
Fjandans englar. Mér er meinilla við þessar skepnur þótt ég sé fyrir lifandis löngu hætt að trúa á slík hindurvitni. Og þeir ofsækja mig ennþá á stundum og verða til þess að ég verð aftur fimm ára varnarlaust barn. Það er ljóta vesenið.
posted by Hildur at 10:10 PM

Mig grunar að ég eigi ekki eftir að fá nein komment við þessa færslu

Þó svo að ég laðist eingöngu að karlmönnum þá verð ég nú að segja að ég hef alveg smekk fyrir huggulegu kvenfólki. Konur, líkt og karlar, geta verið fallegar hvernig sem er á litinn og í ýmsum stærðum og gerðum, en það eru nú til ákveðnir staðlar sem fólk þarf að uppfylla til þess að geta almennt talist fallegt, ég held við getum öll verið sammála því. Það vill líka svo til að allar þær stúlkur sem eru og hafa verið vinkonur mínar eru allar gullfallegar. Ekki bara af því að þær eru heilsteyptar persónur, heldur af því að þær uppfylla fyrrnefnda staðla. Tilviljun? Held ekki.
Því er intressant að segja frá því að einn góður vinur minn sem jafnframt er fyrrverandi elskhugi minn, er nú nýtrúlofaður einni ungri konu, en þau eru bæði útlendingar og geta því blessunarlega ekki lesið síðuna mína (enda held ég að að öðrum kosti væri ég ekki að segja það sem ég ætla að segja núna). Ég samgladdist honum þegar ég frétti af þessum ráðahag, enda allt fyrir löngu búið á milli okkar, en núna áðan var ég að skoða myndasíðuna hans og sjá þessa spúsu hans í fyrsta skipti. Og það runnu á mig tvær grímur. Því að við erum að tala um að gellan er fokking ljót. Um persónuleika hennar veit ég ekkert enda hef ég aldrei hitt hana, og ég vona að þau verði hamingjusöm saman. Samt er pínu leiðinlegt að hún skuli vera svona ljót af því að þá getur hún væntanlega aldrei orðið vinkona mín, því að ég á ekki ljótar vinkonur. Nú kunna einhverjir að vilja skamma mig fyrir ósvífnina og þær skammir eiga svosem rétt á sér. En ég get ekki annað en spurt sjálfa mig, hvað sér gæinn við þessa gellu? Kannski er hún með svona fallegan persónuleika og þá er það líka framför í hans lífi. Því að hvað mig varðar þá hefur réttilega verið á það bent að ég er og verð ætíð piparmeyja ekki af því að ég sé endilega neitt mikið ljótari heldur en sumt af þessu fólki sem er laust við að pipra, heldur er augljósasta skýringin sú að ég er hið mesta dónaskass og frekjuhundur í viðkynningu.
Líklegasta skýringin er þó eflaust sú að gæinn hefur bara vondan smekk á kvenfólki. Annað en ég.
posted by Hildur at 3:47 PM