Hroki
Mér finnst hroki dálítið merkilegt fyrirbæri. Í flesta staði er hann neikvæður með eindæmum og hrokafullt fólk er almennt ekkert sérstaklega vinsælt. Samt verður að viðurkennast að stundum þegar manni finnst fólk vera að því komið þá eiginlega gerir maður ráð fyrir því að það hljóti að vera á einhvern hátt hrokafullt. Þegar ég var í MR tók ég eftir því að nemendur annarra skóla gerðu það oft að umtalsefni sínu hvað við MR nördarnir værum hrokafull, og það án þess að við værum nokkuð að tala um skólann. Við svöruðum þá gjarnan því að MRingar þyrftu engan hroka, þeir væru bara bestir, einungis til að espa hina upp (Kamilla systir var á sínum tíma í MH og varð alltaf brjáluð ef minn skóli var nefndur á nafn og blaðraði um að aðrir skólar væru sko líka alvöru menntaskólar. Það var drepfyndið). En ég held að þetta hrokatal hefði aldrei komið til ef fólki fyndust við MRingar ekki hafa að minnsta kosti pínulitla ástæðu til þess að telja okkur öðrum vitrari og fremri. Ef nemandi í Framhaldsskóla Vestmannaeyja segði að hans skóli væri sá allra fremsti, væri hann sakaður um hroka? Nei það yrði hlegið að því. Það er hins vegar ekki hlegið að því þegar MRingar segja slíkt um sinn skóla.
Hvað um það. Hroki er vondur. Það færi samt enginn að saka Fílamanninn um hroka ef hann segðist vera öðrum fríðari og það sakaði enginn George Bush um hroka ef hann segðist öðrum vitrari enda þeir ekki almennt taldir standa undir slíkum fullyrðingum.
Þess vegna verð ég alltaf dálítið kokhraust í bland við að vera skömmustuleg þegar ég er sökuð um hroka í pólitískum málflutningi. Skömmustuleg af því að mér finnst bjánalegt að vera hrokafull, en kokhraust af því að slíkar ásakanir fela í sér að minnsta kosti smá viðurkenningu á að ég sé að því komin að telja mig hafa meira rétt fyrir mér en aðrir...!
posted by Hildur at 4:36 PM

Það á enn eftir að selja mér hugmyndina um mæspeisið, það er að segja, hvað á að vera svona frábært við það. Ég er alveg á mörkunum að nenna að leggja rækt við mitt mæspeis, enda nenni ég ekki að blogga á útlensku eða nota netið til að hössla útlendinga eins og sumir virðast vera að gera. Kannski er bara málið að reyna að setja þokkafullar myndir af sér þarna. Heyrðu! ég er farin að mála mig, klæða mig smart, setja stút á varirnar og munda stafrænu myndavélina.

Góða helgi
posted by Hildur at 10:17 AM

Það er aldeilis sniðugt að sjá öll þessi páskaegg í verslunum landsins. Og enn sniðugara er að sjá páskaeggin frá Freyju, en með þeim fylgja alltaf Rís súkkulaðistykki. Það er þó aldeilis vel til fundið. Hver hefur ekki setið á páskadag að háma í sig páskaeggi og hugsað um leið: Mikið væri nú gott að gæða sér á súkkulaðistykki með þessu!
posted by Hildur at 9:50 AM

Það er skömm að segja frá því en ég hef pínulitla unun af því að segja við fólk; "Hvernig var um helgina? Takk fyrir smsið!" í hvert skipti sem tilefni gefst til. Satt best að segja verð ég rétt fegin þegar aðrir en ég taka sig til og skandalísera sökum ölvunar og senda einlæg sms út um allar trissur, líka þegar viðtakandinn er ég. Því að það þýðir bara að ég er ekki eina þorpsfíflið. Kæra fólk, hafið engar áhyggjur af því hvernig þið hegðið ykkur undir áhrifum áfengis í minni návist og hvort þið bullið einhverja dómadags vitleysu. Ég veit vel að þið meinið ekkert með því og ef EINHVER ætti að sýna slíkri hegðun skilning þá er það hún ég.
posted by Hildur at 12:10 PM

Eins og sést ákvað ég að breyta til og lita hárið á mér ljóst ásamt því að klippa það. Þetta er rosalega flippuð og fríkuð hárgreiðsla, en það er bara af því að mig langar svo að vera flippuð og fríkuð.
Sjáið líka hvað það hefur hýrnað yfir mér.
posted by Hildur at 1:29 PM