Alltaf er jafn skemmtilegt að kíkja á hina árlegu Gay pride göngu. Ég fór áðan með systur minni og systurdóttur og ekki þótti okkur leiðinlegt að sjá þessa litadýrð og ég tala nú ekki um tjútta við júróvisjónlögin!
Gunnar í Krossinum og fleiri spámenn hafa jafnan varað við því að samkynhneigt fólk sé að bera kynhneigð sína á torg af því að aðrir gætu bara smitast af hneigðinni. Hingað til hefur alltaf hnussað í mér við slíkar fáránlegar getgátur, en nú er ég búin að komast að því að kristilegir íhaldsmenn hafa alltaf rétt fyrir sér. Ég er nefnilega orðin snar öfug og það verður ekki aftur snúið. Ætli aðrir gagnkynhneigðir göngugestir séu ekki líka komnir út úr skápnum eftir þessa sýningu, þannig að bráðum hættir mannkynið að fjölga sér.
Þannig að stelpur! Ég er á lausu.

Þessi mynd er tekin kvöldi áður en kynvillan náði tökum á mér og sjáið þið hvað ég er sakleysisleg á að líta.
posted by Hildur at 6:06 PM

Rúsínan í pulsuendanum
Eitt af nýjungunum hjá Fróðablöðunum er að birta lista yfir alla starfsmenn fyrirtækisins á einni af fremstu síðunum. En það sem er svo skrítið er að undir Blaðamenn er ég alltaf nefnd síðust. Samt hef ég hvorki lengsta né stysta starfsaldurinn, og H er svo sannarlega hvorki fyrst né síðast í stafrófinu. Ég veit ekki hvernig röðunin er hugsuð, en ég vona að ég sé ekki síðust af því að ég teljist vera síst.
Þetta sést svosem ekki vel á þessari mynd, enda er hún tekin í myndavélasíma; en þið skiljið hvað ég er að fara. Allavegana vona ég helst að ég sé nefnd síðust af því að það er verið að geyma það besta þar til síðast.

Góða helgi.
posted by Hildur at 12:10 PM

Rokkstar Súpernóva
Fyrir örfáum misserum hefði mig eflaust rekið í rogastans ef því hefði verið hvíslað að mér að ég ætti eftir að kunna að meta raunveruleikasjónvarp þar sem saman koma útbrunnir rokkarar sem upprennandi söngvarar kepptust um að fá að syngja með. Ef ég væri beðin um að syngja með þessum væmnu karlhelvítisandskotum í Supernova hefði ég KANNSKI hugsað málið fyrir álitlegar fjárhæðir. Og ég veit ekki hvað ég myndi gera ef ég yrði neydd til þess vera á staðnum þarna í Los Angeles og þurfa að hlusta á skvísuna sem kynnir á milli atriða, í stað þess að geta stillt á mjút í hvert skipti sem hún hefur raustina. Sjaldan hef ég heyrt jafn leiðinlega rödd með jafn leiðinlegu tónfalli og hrynjanda og þessa. Og hingað til hef ég samviskusamlega forðast að hlusta á hina ekki svo góðu hljómsveit Á móti sól og því hefði ég aldrei trúað að ég myndi fylgjast með meðlimi hennar spreyta sig í sjónvarpinu ótilneydd.
En annað hefur komið upp á daginn. Ég er nefnilega afar ánægð með gengi Íslandsvinarins Megnýs í þættinum. Hann kemur ekki einungis fyrir sem ljúfmenni og ábyrgur fjölskyldufaðir heldur þá kann hann bæði að syngja og spila. Í raun finnst mér leitt að það eina sem stendur honum til boða í þættinum sé möguleiki á að syngja með þessum lifuðu körlum í Súpernóvu. Þó er mögulegt að hans bíði frægð með einhverri annarri hljómsveit eftir að keppni lýkur.
posted by Hildur at 11:24 AM

Úr því að minnst er á íslenskt mál
Um daginn skrapp ég í bakarí og bað um Kaffi Latte í götumáli. Stelpan sem var að afgreiða varð rosa hissa á svipinn og spurði "Ha?? Meinarðu... teik avei?"
Það er ekki gott mál.

Fyrir um það bil tveimur árum var ég farin að kunna að meta kaffi frá hinum ýmsu suðrænu löndum, og ég man að ákveðið kaffi frá Kenýa var í uppáhaldi. Ég varð þá afar áhugasöm þegar ég sá á einhverju kaffihúsinu boðið upp á kaffi "to go" á afar hagstæðu verði. Ég bað því þjóninn um að útskýra fyrir mér hvernig þetta kaffi frá Tógó væri og hvort hann mælti með því.
posted by Hildur at 11:24 AM

Íslenskulögreglan ég kættist all svakalega þegar ég sá þetta á vísindavefnum. Málið er að ég er haldin ólæknandi málfarspervertisma og í raun rann ég allharkalega til í sætinu mínu þegar ég sá að ég hafði fengið svar við minni spurningu.
Þó er ég ekki alveg ánægð með svarið. Mér finnst alveg augljóst að fólk frá Litháen hljóti að vera litháenskt, Filippseyingar séu filippseyskir og að þeir sem segi Japanir séu asnir.
Heimurinn væri betri ef það væri ég sem fengi alltaf að skera úr um hvað er rétt íslenska og hvað ekki.
posted by Hildur at 10:49 AM