Eitthvað fór ég að hafa áhyggjur af því að ég get ekki gert upp við mig hvor er meira óþolandi, Robbie Williams eða Robin Williams. Ég hef algeran ímugust á hvorum tveggja en get ekki veitt nein skammarverðlaun af því að þeir eru báðir jafn viðurstyggilega óþolandi.


posted by Hildur at 5:49 PM

Mér er rétt sama þótt ég móðgi stundum annarra manna skoðanir. Mér finnst hins vegar leiðinlegt þegar ég fæ að heyra setningar á borð við "Þetta eru fordómar" og "Við erum eins misjöfn og við erum mörg" og "Þú ert að misskilja ef þú segir það sem þú segir" og svo framvegis. Frekar vil ég að þeir móðguðu verði fagurrauðir í framan, berji í borð og kalli mig "helvítis kommatitt", minni mig á hversu marga Stalín drap og bendi mér góðfúslega á að nasistar hafi jú heitið "NationalSOZIALISTISCHE Deutsche Arbeiterpartei".
Það finnst mér miklu kristilegra.

Góða helgi.
posted by Hildur at 11:56 AM

Nú er ég hvorki sérstakur málsvari örmjórra kvenna né spikfeitra, og ekki heldur tískusýningarstúlkna. En vill einhver benda þessum hressa tíkarpenna á að það að meina konum með BMI stuðul undir 18 þátttöku í tískusýningu þýðir ekki að verið sé að hvetja til offitu. Og hún spyr hvernig fólki þætti ef feitum væri meinað að vinna á skyndibitastöðum. Ég efast um að skyndibitastaðir hafi úr svo mörgum áhugasömum starfsmönnum að velja að þeir geti gert kröfur um holdarfar, en það gleður vonandi þessa hressu sjálfstæðiskonu að heyra að ófáum tískusýningarstúlkum er gert að létta sig, því að annars fá þær ekki djobb.

Æ hvað heimurinn er alltaf einfaldur í augum hægrimanna.
posted by Hildur at 9:53 AM

Sniðugt
Fór í hengimann leikinn með systrum mínum um helgina og það er skemmst frá því að segja að þegar kom að mér að velja orð hengdist karlinn þar sem þær föttuðu það ekki.
Orðið var:
K Ó L A D R Y K K U R

Þegar þær höfðu tapað fyrir mér í hengimann klikkuðust þær, rifu blaðið, brutu blýantinn og börðu mig í plokkfisk með orðunum "Þetta eeeeer ekkert oooorrð!!!" auk ýmissa gífuryrða sem ljótt væri að hafa eftir.
Þær eru kannski ekki skaprólegustu manneskjur í heimi, en nú vil ég biðja hæstvirtu lesendur þessarar síðu að prófa þetta orð næst í hengimann, athuga viðbrögðin og deila þeim með mér.
posted by Hildur at 12:37 PM

Fyrir helgina fór ég að finna aðeins fyrir flensueinkennum en þar sem landsþing Ungra Jafnaðarmanna var þá framundan ákvað ég að "fresta" flensunni eins og ég geri stundum. Nema hvað, landsþingið heppnaðist ágætlega og ég fann ekki fyrir neinum flensuskratta enda barðist ég þar af krafti og elju fyrir málstað okkar vinstrisinnuðu kratanna, þó ég segi sjálf frá. Ég var bara edrú á bíl á laugardagskvöldið þannig að engin þynnka varð til þess að draga mig niður. En núna, á mánudegi þegar ég er í vinnunni, líður mér eins og ég sé hálf þunn. Það er auðvitað enginn tími til þess að vera með flensu heldur núna þannig að ég held ég verði bara gerviþunn út vikuna og leggist svo í flensu næstu helgi.
posted by Hildur at 1:46 PM